Benedikti XVI Mesazhi "Urbi et Orbi" - "Romës e Botës", në të Dielën e Pashkëve
“Surrexit Christus, spes mea” – “U ngjall Krishti, shpresa ime”(Sekuenca
e Pashkëve). Ju uroj të gjithëve ta dëgjoni zërin ngazëllues të Kishës, me
fjalët e himnit të lashtë, vënë në buzët e Marisë Magdalenë, e para që u takua me
Krishtin e ngjallur në agimin e Pashkëve. Ajo ngarendi tek dishepujt e tjerë e, me
zemrën që mend i dilte nga kraharori, u dha kumtin: “Pashë Zotin!” (Gjn 20,18).
Edhe ne, që përshkuam shkretëtirën e Kreshmëve dhe ditët e dhimbshme të Mundimeve,
sot mund ta japim me brohori, lajmin e fitores: “U ngjall! Vërtet u ngjall!”. Çdo
i krishterë rijeton ato çaste, të cilat i jetoi Maria Magdalenë. Është takim, që ta
shndërron jetën: takim me Njeriun e pashoq, që na bën të shijojmë gjithë mirësinë
dhe vërtetësinë e Hyjit, na çliron nga e keqja, e jo cektësisht, përkohësisht, por
na shpëton rrënjësisht, na shëron plotësisht e na rikthen dinjitetin tonë. Ja,
Maria Magdalenë e thërret Jezusin: “shpresa ime”: sepse ai e rilindi, i dha ardhmëri
të re, jetë të mirë, të çliruar nga e keqja, “Krishti, shpresa ime”, do të thotë
se çdo dëshirë e mirë që kam në zemër, me ndihmë të Tij mund të realizohet. Me Të,
shpresoj se jeta ime mund të jetë e mirë, e përkryer, e amshuar, sepse vetë Zoti erdhi
ndër ne e hyri në natyrën tonë njerëzore.
Por Marisë së Magdalës, ashtu si
dishepujve të tjerë, iu desh ta shikonte Jezusin të poshtëruar nga krerët e popullit,
të kapur, të rrahur me kamxhik, të dënuar me vdekje e të kryqëzuar. Duhet të ketë
qenë diçka thellësisht e padurueshme ta shikoje vetë Mirësinë të fyer nga hakmarrja.
Me vdekjen e Jezusit u duk sikur mori fund një herë e përgjithmonë çdo shpresë e atyre,
që besonin në Të. Por pikërisht besimi nuk u shua kurrë: sidomos në zemrën e Virgjërës
Mari, Nënës së Jezusit, flaka e besimit mbeti e ndezur edhe në errësirën e natës më
të zezë. Shpresa, në këtë botë, nuk mund të mos e llogarisë forcën e së keqes. Nuk
e pengon vetëm muri i vdekjes. Edhe më shumë se vdekja e pengojnë majat e mprehta
të zilisë e të mendjemadhësisë, të mashtrimit e të dhunës. Jezusi kaloi përmes leqeve
mortore, për të hapur shtegun kah Mbretëria e jetës. Erdhi një çast, kur u duk se
Jezusi e kishte humbur betejën: errësira pushtoi mbarë tokën; heshtja e Hyjit ishte
e plotë, shpresa tingëllonte si fjalë tanimë krejt e kotë.
Por ja, në agimin
e ditës pas së shtunës, varri u gjet i zbrazët. Pastaj Jezusi iu duk Magdalenës, grave
të tjera, dishepujve, e feja rilindi, më e gjallë, më e fortë se kurrë, tashmë e pamposhtur,
sepse e themeluar mbi një përvojë vendimtare: Vdekja e jeta në bejleg ranë/ Armët
vringëlluese n’luftë i ndanë/ Prijës’ i jetës që vdiq, jeton/ Më i gjallë se të gjallët
mbretëron!”. Shenjat e ngjalljes flasin vetë për fitoren e jetës mbi vdekjen,
të dashurisë mbi urrejtjen, të mëshirës mbi hakmarrjen: flasin vetë “Varri i Krishtit,
i zbrazët /lumnia e Krishtit të ngjallur,/ egjujt dëshmitarë, riza e petkat palosur
mënjanë.
Të dashur vëllezër e motra! Në se Jezusi u ngjall, atëherë, e
vetëm atëherë – ndodhi diçka vërtet e re, që e ndryshoi jetën e njeriut e të botës.
Atëherë Ai, Jezusi, është dikush, në të cilin mund të besojmë në mënyrë absolute,
e jo vetëm në mesazhin e Tij, por në Të, sepse i Ngjalluri nuk i përket së kaluarës:
është i pranishëm sot, i gjallë. Krishti është shpresë e ngushëllim për botën, posaçërisht
për bashkësitë e krishtera, që persekutohen e diskriminohen për shkak të fesë. E është
i pranishëm si forcë e shpresës, përmes Kishës së Tij, gjithnjë pranë çdo situate
vuajtjeje e padrejtësie.
O Krisht i ngjallur, jepi shpresë Lindjes së Mesme,
që të gjithë pjesëtarët etnikë, kulturorë e fetarë të kësaj zone të punojnë për të
mirën e përbashkët dhe për respektimin e të drejtave njerëzore. Në Siri, veçanërisht,
pushoftë gjakderdhja e rifilloftë pa vonesë rruga e respektit, e dialogut, e pajtimit,
siç urohet edhe nga bashkësia ndërkombëtare. Refugjatët e shumtë, ardhur nga ky vend,
në kërkim të ndihmës humanitare, gjetshin mikpritje e solidaritet, që mund t’ua lehtësojnë
vuajtjet e tyre të rënda. Fitorja e Pashkëve inkurajoftë popullin irakian që të mos
kursejë asnjë përpjekje për të ecur përpara në rrugën e stabilitetit e të zhvillimit.
Në Tokën e Shenjtë, izraelitë e palestinezë rifillofshin me guxim procesin e paqes.
O Zot, ngadhënjimtar mbi të keqen e mbi vdekjen, ndihmoji bashkësitë e krishtera
të Kontinentit afrikan, jepu shpresë për të përballuar vështirësitë, bëji veprimtarë
të paqes e mjeshtra të zhvillimit të shoqërive, të cilave u përkasin.
Jezus
i Ngjallur, ngushëlloji popullsitë e vuajtura të Bririt të Afrikës e nxiti të pajtohen;
ndihmoji Zonën e Liqeneve të Mëdha, Sudanin e Sudanin e Jugut, duke u dhuruar banorëve
të tyre forcën e faljes. Malit, që po kalon një çast delikat politik, Krishti i Lum
i dhëntë hirin e paqes e të stabilitetit. Nigerisë, kohët e fundit teatër ndeshjesh
të përgjakshme terroriste, gëzimi i Pashkëve i ndikoftë energjitë e nevojshme për
rindërtimin e një shoqërie paqësore, që respekton lirinë fetare të qytetarëve të saj. Për
shumë vjet Pashkët të gjithëve!