Nata e Shenjtë e Pashkëve të Ngjalljes së Krishtit!
E Shtuna e Madhe, dita e tretë e Treditëshit e Nata e Shenjtë e Pashkëve të Ngjalljes
së Krishtit. E Shtuna e Madhe e Pashkëve është dita e varrimit dhe e heshtjes.
Mirëpo në barkun e tokës ruhet e rritet porsi fara, fidanishtja e jetës së re. Në
këtë Natë të Shenjtë, në të cilën Jezu Krishti, Zoti ynë kaloj nga vdekja në jetë,
Kisha, e përhapur kudo në botë, i thërret bijtë e vet të rrinë zgjuar në uratë. Në
këtë Natë të Shenjtë, e rijetojmë Pashkën e Zotit përmes dëgjimit të Fjalës Hyjnore
dhe pjesëmarrjes në Sakramente; Krishti i Ngjallur e përforcon në ne shpresën e
pjesëmarrjes tonë në fitoren e Tij mbi vdekje e na ofron mundësinë të jetojmë me Të
në Hyjin Atë. Kremtimi i Natës së Ngjalljes së Jezu Krishtit është zemra e thelbi
i krishterimit, është qendra e kulmi i tërë vitit liturgjik kishtar. Besimtarët
e krishterë, në këtë Natë të Shenjtueshme, janë në pritje të kumtimit të Lajmit të
Mirë të Ngjalljes së Shpëtimtarit të botës, Jezu Krishtit. Në solemnitetin
e Natës së Shenjtë të Pashkëve, me Liturgjinë Hyjnore përshkohen ritet e simbolet
përmes të cilave të gjithë besimtarët e dinë dhe kuptojnë mesazhin e shpresës që përçojnë,
mesazhin e Jetës që buron nga Krishti Gjallë, që e asgjësoi vdekjen përgjithmonë.
Në këtë Natë tejet të Shenjtë, ti bashkojmëzërat tanë me zërin e Kishës,
që kumton lajmin gazmor e solemn të Ngjalljes së Krishtit, Dhëndrit e Zotit të saj,
fitimtar mbi vdekjen e mbi mëkatin. Ngjallja e Jezu Krishtit është shpresa jonë. Jezusi
u Ngjall edhe për ne, që duke besuar në Të, ta kemi jetën e vërtetë e të pasosur.
Mase dymijë vjet pas kësaj ngjarjeje, Kisha e jeton si të ndodhte sonte, kur ne ju
drejtojmë urimin tonë: KRISHTI U NGJALL, ALELUJA; VERTETE U NGJALL ALELUJA!
- PËR SHUMË MOT PASHKËT! dëgjues të nderuar! Krishti, Shëlbuesi ynë, fitoi
mbi vdekjen: Krishti u Ngjall! E i fton të gjithë, burra e gra, të çdo kohe e të çdo
vendi, ta ndihmojnë për ta pohuar e kumtuar fitoren e tij me të njëjtat armë: armët
e drejtësisë e të së vërtetës, të mëshirës e të paqes, të faljes e të dashurisë. Kjo
është zemra e mesazhit të Pashkëve: Urime - Gëzuar - Pashkë të bardha! E liturgjia e Vigjiljes së Pashkëve rregullohet në disa pjesë, rite e simbole,
që shprehin e kumtojnë mesazhin qendror të Natës së Pashkëve, e cila quhet dhe konsiderohet
me të drejtë si “Nëna e të gjitha netëve të lutjes”, mesazhin e fitores së Jezu Krishtit
mbi vdekje, mesazhin e Ngjalljes së Krishtit. Ritet e simbolet
e Natës së Shenjtë të Pashkëve Treditëshi i Pashkëve arrin kulmin në Natën
që kremtohet ndërmjet së Shtunës së Madhe e të Dielës së Ringjalljes. E treta ndër
ditët e shenjta është, ndër të gjitha, më e pasura me fjalë e shenja, që shprehin
fitoren mbi vdekjen e mbi forcat e errëta të së keqes. Është shpresa që u ofrohet
të gjithë atyre që besojnë në Zotin e Kryqëzuar e të Ngjallur. E Shtuna e Madhe
është ditë lutjeje e agjërimi, jo si pendesë, por si pritje e dëshirë për bukën e
vetme që ushqen me të vërtetë: bukën e të Ringjallurit.Nata e Pashkëve dallohet nga
e Shtuna e bën pjesë në ditën e Pashkëve; është festa e vërtetë, është një Natë “nëna
e të gjitha netëve”. Katër janë simbolet e liturgjisë së natës së Pashkëve, e cila
kremton ringjalljen e Zotit: drita, fjala, uji dhe buka. Të gjitha shpjegohen me mënyrat
me të cilat Jezusi e ka paraqitur veten: Jezusi është drita e botës, është fjala e
fundit e Atit. Është uji që shuan etjen e përtërin, është buka e jetës. Nata e
Pashkëve na bën të hyjmë në plotësinë e misterit të tij: na bën të takojmë Jezusin
si i Ringjalluri, i Gjalli, Ai që, duke na treguar fytyrën e vërtetë të Atit, mund
të na mbushë me gëzim e shpresë. Nata e Pashkëve është rrënja e çdo shprese dhe e
kuptimit të krishterë të jetës. Kush ndjek Jezusin për jetë, kush ka jetuar në ditët
e mëparshme solidaritetin në dhimbje, tani mund të jetojë me gëzim festën. Nëse
gjatë Krezhmëve kemi reflektuar mbi peshën e mëkateve e mbi rrezikun e dështimit në
jetë, këtu fillon shpresa për një ndihmë nga lart, që i jep vlerë ekzistencës, megjithëse
në mes të errësirës e dhimbjes. Bashkësive të krishtera, Nata e Pashkëve duhet t’u
japë guximin për ta dëshmuar këtë shpresë, guximin për ta arsyetuar shpresën e jetës,
që mbajnë në zemër. T’u japë aftësinë për të ndërmarrë impenjime e iniciativa, që
i thonë botës sa e mbushur me të ardhme e me mundësi pozitive është feja në Jezusin. E
tani të përshkruajmë e të përshkojmë së bashku ritet e simbolet liturgjike të Natës
së Shenjtë të Pashkëve Liturgjia e dritës
Çasti
i parë i Natës së Pashkëve e përqendron vëmendjen mbi dritën: zjarri i ndezur në errësirë
kujton Shpirtin dhe ngrohtësinë e Zotit, forcën e tij ripërtëritëse, por edhe dashurinë
njerëzore, që i jep ngrohtësi e kuptim jetës. Imazhi i qiriut në procesion drejt
kishës e thërret popullin e besimtarëve të ndjekë Jezusin, dritën e botës. Qiriu që
jep dritë duke u konsumuar, si Jezusi, u thotë të krishterëve se askush nuk mund të
jetë dritë për të tjerët, pa flijuar e hequr dorë nga vetvetja. Do të ishim të kënaqur
nëse nga sakrificat tona të vogla, të tjerët të përfitonin ngrohtësi e jetë. Për disa
aspekte, bota është akoma e zhytur në errësirë. Lajmi i Mirë i Pashkëve nuk mund të
mbetet vetëm një himn fjalësh të bukura. Kulti i vërtetë i të krishterit është jeta
e tij. Liturgjia e Fjalës Liturgjia
ofron mundësinë e shumë leximeve: zgjedhja e të gjithave ose vetëm e disave prej tyre
duhet të japë kuptimin e domethënien e një historie të përshkuar nga iniciativa e
Zotit. Fjala bëhet histori e përgatitet të presë Jezu Krishtin. Fjala është në
fillim të krijimit, nëpërmjet të cilit Zoti dhuron të qenit, pra i jep kuptim gjithçkaje
ekziston. Në veçanti, krijon njeriun në përngjasim me Të, duke vendosur tek ai farën
e një prirjeje të natyrshme drejt Krijuesit të vet. Fjala e Zotit udhëheq rrugën
e çlirimit e të rithemelimit të popullit, që bëhet popull i Zotit nëpërmjet mundit
e kërkimit, gabimit e kthimit drejt Zotit. Deri tek Ungjilli i shën Markut, ku
tregimi i grave që gjejnë varrin e Jezusit bosh e çon besimtarin tek Ai, që nuk duhet
kërkuar ndër të vdekurit, tek i Gjalli, që duhet takuar në historinë e përditshme. Liturgjia e Pagëzimit Është çasti që na çon tek jeta e re e marrë përmes
Pagëzimit: është pra momenti-kujtesë i ngjarjes themelore të qenies sonë si Kishë.
Përtëritja e impenjimeve, që të tjerët i kanë marrë për ne në momentin e Pagëzimit
do të thotë një vetëdije e re për përgjegjësinë tonë në histori. Liturgjia Eukaristike
Eukaristia e Natës së Pashkëve është një “akt
falënderimi” krejt i veçantë: “Pashkët ishin momenti në të cilin e pati fillesën Eukaristia
e vërtetë! Prandaj edhe misteri i natës së Pashkëve përqendrohet tek Eukaristia, të
cilën Krishti nuk e paraqet i vetëm, por së bashku me Kishën e vet. Ajo merr pjesë
në Eukaristinë e tij, që përuron solemnitetin e madh të Rrëshajëve, në të cilat bashkësia
e krishterë e shëlbuar falënderon Atin së bashku me Birin”.
Kremtimi i Natës
së Pashkëve nuk duhet të përfundojë para mesnatës, “sepse duhet të presim deri në
atë çast të saktë kthimin e Hyjit”. Ajo Natë është e mbushur me misterin e pritjes.
Qiriu qëndron pranë ambonit, i cili përfaqëson Varrin bosh. Ai është simbol i të Ringjallurit.
Gratë që në mëngjes herët, shkojnë te varri për ta mbështjellë “trupin e vdekur” të
Jezusit me një vaj të përmortshëm gjejnë Fjalën e ngjallur. Nata e Pashkëve kremton
krejt Misterin e festës e në çdo pjesë të saj kryhet kalimi nga vdekja në jetë. Kulmi
i Natës është Eukaristia: buka e të Ngjallurit për bashkësinë e vet.