Нунцый у Ізраілі лічыць, што трэба святкаваць Вялікдзень па праваслаўным календары
Апостальскі Нунцый
у Ізраілі і Палестыне, арцыбіскуп Антоніо Франко, распавёў агенцтву “AsiaNews”, што
сведчанне веры хрысціян Святой Зямлі мае важнае значэнне для невялікіх хрысціянскіх
супольнасцяў арабскага свету, куды вяртаецца ісламскі радыкалізм. Арцыбіскуп адзначыў,
што ў гэтым годзе святкаванні Вялікага Тыдня праходзяць нашмат спакойней, чым у мінулыя
гады, нягледзячы на атмасферу насілля ў многіх краінах гэтага рэгіёну, асабліва ў
Сірыі. Іерарх паведаміў, што ў працэсіі падчас Пальмовай нядзелі, якая прайшла з Бэтаніі
ў Іерусалім, прыняло ўдзел больш за 20 тыс. вернікаў, у два разы больш, чым у мінулым
годзе.
Адносна прапановы францішканскага кусташа Святой Зямлі, айца П’ербацісты
Піццабаллы, які прапанаваў, каб з 2013 г. католікі святкавалі Вялікдзень па праваслаўным
календары, арцыбіскуп Франко адзначыў, што гэта змена выклікана жаданнем умацаваць
экуменічныя адносіны паміж двума супольнасцямі, але таксама і па душпастырскіх прычынах,
бо ў Святой Зямлі пражывае вялікая колькасць змешаныя сем’яў. Іерарх заявіў, што такая
практыка ўжо існуе ў Іарданіі, дзе католікі і праваслаўныя будуць разам адзначаць
Вялікдзень 15 красавіка, а таксама ў некаторыях супольнасцях на палестынскіх тэрыторыях.