Sivjet ecim pas Krishtit në Udhën e Kryqit, së bashku me familjet tona e familjet
e botës. Sepse edhe familja, në se dëshiron ta ndjekë Krishtin, duhet të marrë mbi
supe kryqin e vet, të rëndë madje. Me bindjen se, me sytë e ngulur te Zoti, do të
mund ta përballojë betejën e jetës. Është mesazhi, që Danilo e Ana Maria Xanxuki,
të lëvizjes së Fokolarëve, i përçojnë sonte njerëzimit, nga Koloseum, në zemër të
Romës së krishterë, me meditimet e tyre, shkruar për Udhën e Kryqit. I kryeson Benedikti
XVI, atje ku u derdh gjak martirësh, që ecën e ecin në shekuj mbi gjurmët e Jezusit.
Në 14 stacionet tradicionale, të cilat meditohen, ndjehen fort problemet, që shqetësojnë
jetën e bashkëshortëve: tradhtitë, moskuptimet, dyshimet, sëmundjet, lindja e fëmijëve,
edukimi i tyre...
Tekstet e Udhës së Kryqit u nisën nga Shtëpia Botuese e
Vatikanit, drejt vitrinave të librarive, të hënën e kaluar. I ndjek mbarë bota e krishterë
e jo, përmes mjeteve të ndryshme të komunikimit masiv. Sepse kjo Udhë nuk i përket
vetëm të krishterit.
Në hyrje të Udhës së sivjetme të Kryqit lexohet: “Jezusi
na thotë: ‘Kush dëshiron të vijë pas meje, të mohojë vetveten, të marrë çdo ditë
kryqin e vet e të më ndjekë’. Kjo ftesë u drejtohet të gjithëve, njerëzve të vetmuar
e të martuar, fëmijëve e të rinjve, të rriturve e pleqve, të pasurve e të varfërve,
të bardhëve e të zinjve. U drejtohet vetmitarëve e familjarëve, miliona familjeve
në botë. Të gjithë anëtarëve të tyre, që i lidh ngushtë gjaku i përbashkët. Por që
shpesh vuajnë për shkak të tradhtisë së njeriut më të dashur. Ku shkoi gëzimi i afrimit,
dëshira për t’u bërë një gjë e vetme? Ku shkoi deklarata “bashkë, përgjithmonë”, shqiptuar
në një ditë, që dukej më e bukura e jetës? Nga Kryqi, Krishti i shikon të gjitha pabesitë.
Shikon si zbehet e shuhet dashuria, që i lidhi bashkëshortët, shikon plagët e hapura,
besimin e tradhtuar, sigurinë e zhdukur, lidhjen e këputur, besën e thyer. Burrin
që braktis familjen e gruan, në sa gruaja i lutet Zotit të kryqëzuar t’i japë forcë
për të mos gjykuar, për të mos u rrëzuar, për hir të krijesave të vogla, që e presin
në shtëpi e s’kanë tjetër mbështetje, pse mbetur pa atë. Prej këndej, mëdyshjet për
vlerën e familjes. Vetmia. Djepat bosh! Jezusi dëgjon, kupton e fton: “O njeri,
që e shikon me mosbesim familjen! Mos shko vetëm udhës së jetës!”. Jemi në fund të
Stacionit të parë.
Para se të niset në rrugën e mundimeve, Jezusi, i braktisur
nga apostujt, në gjumë të thellë aty pranë, mes qiellit blu e pyllit të ullinjve,
nis të trembet. E pritmja, që e njihte mirë, ia rrënqeth mishin e gjakun; parandjen
dhimbjen e padurueshme. Shpirti njerëzor, që s’do dhimbje, para sosjes kalamendet
në kllapi. Krishti çon dorën, si të donte t’i dëbonte mendimet e këqija prej mendjes.
Si një tufë korbash. Për të dalë nga gjiri i errët i drojes, që e priste. Prandaj
i drejtohet Atit, e i lutet: “Në se është e mundur, largoma nga buzët këtë kelk”.
Duke shtuar menjëherë: “Por, u bëftë vullneti yt, jo imi!”.
Në këtë çast dramatik
e solemn njëherësh, të gjithë ata, që kanë vendosur ta ndjekin Udhën e Kryqit, marrin
një mësim të mirë. Si çdo i krishterë, edhe çdo familje ka udhën e vet të kryqit:
ka të sëmurë, të vdekur, dëshira të parealizuara, shkolla të pakryera, pleq të paralizuar,
mungesa, borxhe, varfëri, tradhti, sjellje imorale të njërit a të tjetrit, sherre
me farefisin, me vëllezërit e motrat, e edhe gjëma, që vijnë nga moti i lig. E mijëra
ndjesi të mira shuhen në zemrat njerëzore. Rrëmbehen nga rrjedha e furishme e jetës,
që s’ndalet.
Por çdo i krishterë e çdo familje, në këtë udhë dhimbjeje, mund
e duhet t’i drejtojë sytë kah Krishti, Njeriu-Zot! T’i jetojmë së bashku çastet
e fundit të Jezusit mbi tokë, çastet e dhimbshme të kryqëzimit e çastet sublime,
kur Zoti e dorëzon shpirtin në krahët e Atit qiellor. Mësimi më i lartë e trashëgimi
më i çmuar, që na la, është modeli i jetës së tij.
V/ Adoramus te,
Christe, et benedicimus tibi! R/ Quia per sanctam crucem tuam redemisti
mundum. (V/Të adhurojmë o Krisht e të bekojmë! R/ Pse me Kryqin tënd të
Shenjtë shpërbleve botën mbarë).
Udha e Kryqit posa ka nisur. Jemi ende
në Stacionin e parë.
Jezus Zot! Në orën, kur kujtojmë vdekjen
tënde, t’i ngulim sytë plot dashuri për të jetuar me Ty, vuajtjet e kësaj nate
mundimesh. Përmblidhen dhimbshëm në britmën misterioze që, në grahma, lëshove
nga kryqi: “Zoti im, Zoti im, pse më lëshove dore?”. Jezus, dukesh Zot i perënduar
në horizont; Bir pa Atë e Atë pa bir. Kjo britma jote njerëzore-hyjnore, që
grisi ajrin mbi Golgotë, na ngacmon e na mahnit edhe sot; vijon të na tregojë
diçka që kurrë s’u dëgjua, që kurrë nuk u pa. Diçka, me aromë shëlbimi; vdekje,
prej nga gurron jeta, terrina, që lindin dritën përçarje, që çon në unjësi.
Etja
për të qenë pranë teje na shtyn të të njohim edhe kështu, të braktisur nga
të gjithë kudo, edhe në dhimbjet tona vetjake e kolektive, edhe në mjerimet
e Kishës sate edhe në netët e errëta të njerëzimit: për të shartuar në lëndën
e jetës sonë sythet e dritës sate, prej nga buron bashkimi. Sot, si atëherë pa
flinë e Kryqit, s’do të kishte Pashkë.
“E shkarkojmë edhe ne barrën e
dhimbjes sonë mbi supet Tua. Edhe ne, bashkëshortët, ne e familjet tona.... Sa herë
nuk duhemi më, sa herë ia hedhim fajin njëri-tjetrit, sa herë nuk falim, sa herë shikohemi
shtrembër... Shkarkojmë çdo ditë barrën e dhimbjes sonë, mbi kryqin Tënd, e nisemi,
me frymë të re, brijave të thyeshme të jetës. Me trup të lodhur, me zemër të uritur... Kështu
reflektojnë Danilo e Ana Maria Xanxuki, në çastin kur Jezusi ngarkohet me kryq. Në
Udhën e tyre të Kryqit fati i familjes së sotme lidhet ngushtë me Mundimet e Krishtit.
Krishti dënohet me vdekje, në Stacionin e parë, ngarkohet me kryq,
në të dytin; rrëzohet për herë të parë, në të tretin... Rrëzohet. Disa
herë. E rrëzohen edhe familjet, në udhën e tyre të jetës. Bien e mundohen të ringrihen.
Jo pa plagë. Sa ndarje, sa tradhti, nënvizojnë bashkëshortët në meditimet tyre. E
pastaj, sa divorce, sa fëmijë të mbytur pa lindur ende, sa braktisje. Prej këndej,
lutja: “Jezus ndihmona ta kuptojmë dashurinë, ndihmona të lypim falje e të falim!
Që tingujt e zërave tona të mos shndërrohen në nëmje. E zemrat, në gjuhë flakësh,
që përcëllojnë!”
Ndërmjet mëkateve, të cilat e ligështojnë njeriun dhe e rëndojnë
barrën e Kryqit të Krishtit, në meditimet e sivjetme, janë tundimet që të shtyjnë
t’i pranosh joshjet e botës, tërheqjet vezulluese të kënaqësisë së menjëhershme, shkeljen
e dinjitetin e njeriut – burrë a grua qoftë – të cilin askush, e asgjë në botë, nuk
duhet ta njollosë duke depërtuar paturpësisht në fshehtësitë e korpit. Si gjarpërinjtë
e helmatisur.
Në stacionin e gjashtë, Jezusi takohet me Nënën.
Në të shtatin, Veronika, që fshin fytyrën e Jezusit, na nxit ta shohim
fytyrën e Zotit në fytyrën e çdo vëllai, të çdo foshnjeje në ag e të çdo plaku, në
muzg të jetës. Që njeriu ta presë qetë-qetë agun. Pëshpëritje Parajse nënash që përmbi
djep përkulen! E të mos e shikojë me tmerr zhdukjen e diellit pas malit të viteve.
Në fytyrën e pleqve shikojmë mbarimin e çdo njeriu. E tonin. Nuk mund të mos na dhimbsen,
pse kemi një emër të përbashkët!
E nuk harrojnë, Danilo e Ana Maria se Udha
e Kryqit të Krishtit është e njëjta udhë, në të cilën ecin martirët e sotëm, ata që
vuajnë, që mundohen, sepse bij të një Kishe, e cila vijon të persekutohet ende në
vise të ndryshme të botës. Prej këndej, u bëjnë thirrje familjeve, të mos dremisin,
të zhytyra në mirëqenie, të mos kërkojnë vetëm ëndjet e shfrenuara, të padenja për
njeriun, i cili mund e duhet të jetë shumë më i madh se kënaqësitë, që kalojnë, në
rastin më të mirë, pa lënë asnjë gjurmë. Për të kujtuar se, përveç gjurmëve të gjakut,
derdhur në mbrojtje të jetës, secili nga ne mund të lërë pas edhe gjurmët e Judës,
krejt të padenja për emrin e madh “Njeri”.
Në fund, mësimi më i lartë i Jezusit:
dhurimi i jetës për dashuri. Është mësim që shumë nëna e ndoqën pikë për pikë, kur
pranuan të vdesin për jetën, të mbyllin sytë, që në botë të hapen sytë e ferishteve
të tyre. Jetë për jetë, dhuruan të tyren. E po këtë rrugë e ndoqën e ndjekin edhe
shumë të tjerë, duke iu përgjigjur hakmarrjes me falje, luftës me paqe, terrorizmit,
me dashurinë e krishterë. Ajo, që bota e quan dashuri, s’ka krahasim me dashurinë,
që buron nga kraharori i shporuar i Krishtit në kryq. Këtë mësim u jep Zoti të ngopurve
të kësaj bote, që ta marrin vesh se ka etje shumë më të mëdha, se ajo për para. Se
ka një Pushtet shumë më të lartë, më të thellë, më të përkryer, se çdo pushtet njerëzor.
Themeluesit e mëdhenj të shteteve, barinjtë e popujve, meshtarët misionarë, të
mërguar vullnetarë në fund të botës; ata, e prindërit e tyre, sigurisht dinë diçka
nga kjo ndjesi misterioze. E njerëzit e familjeve, ku u formua gjenia e tyre, qeshin
shpesh me ndokend që, nganjëherë, ua qan hallin për jetën e bijve, aq të shqetë e
aq të panjollë!
Kemi arritur në Stacionin e trembëdhjetë- i parafundit!
Maria e shikon ndër grahma Birin e Hyjit, e birin e saj. Mbi botë dyndet terri.
Dielli zhduket mes rrogomisjes së reve. Ajo e di se është i pafaj. Se ka marrë mbi
vete mjerimet tona, mjerimet e botës. Nëna dhuron Birin, Biri, Nënën. Ia dhuron Gjonit.
Na e dhuron ne! Jezusi e Maria! Familje që mbi Kalvar, jeton e vuan çastin e tmerrshëm
të ndarjes. Vdekja i shkëput nga krahët e njeri-tjetrës, a duket se e shkëput lidhjen
e Nënës me Birin, lidhje e pashoqe, e papërfytyrueshme, njerëzore-hyjnore njëheresh.
Dhurohen të dy, për dashuri. Lëshohen në krahët e vullnetit hyjnor, pa asnjë kusht! Në
greminën pa fund, që hapet në zemër të Marisë, hyn një Bir tjetër. E Asaj i duket
se hyn njerëzimi mbarë. Zbraztësia e zemrës, që i lë Jezusi, mbushet përplot me një
dashuri të re. Dashuri për ne. Në fytyrat e dishepujve, shikon fytyrën e Tij. E nis
të jetojë për ta, për t’i mbështeur, për t’i ndihmuar ta njohin dashurinë e Zotit
e, vullnetlirë, të besojnë në Atin. Ç’na thotë, sot, mua, ty, ne? Ç’i thotë familjes
kjo Nënë me Birin e pështyrë, të përgjakur, të kryqëzuar, të mohuar në prehër? Kjo
Zojë e Dhimbshme? Që ndjen mbi parzëm peshën e një Zoti, të sapozbritur nga kryqi?
Mbetemi pa frymë përballë kësaj skene, që përsëritet. E nuk mund të mos na rrahin
fort zemrat tona të mjera, që e ndjejnë se kjo Nënë e ky Bir po na bëjnë një dhuratë
të pashoqe, të papërsëritshme. U falin gjak të ri, zemrave tona të vjetra, u hapin
horizonte të hapta, mendjeve tona të ngushta, na mbartin nga strehët tona të ulta,
në lartësitë e universit pa kufi. Atëherë s’e dallojmë më vëllain prej të afërmit,
të afërmin, prej të huajit... Atje, mbi Kalvar pranë teje, Jezus, që vdiqe për
ne, familjet tona ndërrojnë fytyrë. Familjet tona pranojnë dhuratën e Zotit, dhuratën
e dashurisë, që na jep krahë, për të rrokur pafundësinë.
Stacioni
i katërmbëdhjetë e i fundit! Mbi Kalvar ka rënë një heshtje e thellë, irreale.
Gjoni, në ungjillin e tij, rrëfen se Kalvari ndodhej në mjedis të një kopshti, ku
ishte një varr, në të cilin s’qe kallur njeri. Pikërisht në këtë varr e vendosën dishepujt
trupin e vdekur të Jezusit. Ai Jezus, të cilin hap pas hapi e njohën si Zot-bërë
njeri, është aty, në terr, kufomë. Në vetminë e panjohur, pa Të, ndjehen të humbur.
Nuk dinë ç’të bëjnë, si duhet të sillen. S’u mbetet tjetër, veçse të ngushëllohen
në krahët e njëri-tjetrit, duke u shtrënguar fort e duke shqiptuar atë “Zoti të dhëntë
forcë”, që vijon të tingëllojë dhimbshëm, sa herë hapet një varr i ri! Por pikërisht
nga ky shtrëngim buron feja, kujtimi i Jezusit, i fjalëve që tha, i veprave që kreu
kur ishte ende ndër ta. Atëhere kur nuk e patën kuptuar plotësisht. Atë çast, fryma
e Zotit, e dalë nga goja, prej qiellit ra si dritë përmbi atë gropë të zezë. E aty
zu fill Kisha, në pritje të ngjalljes e të ndikimin të Shpirtit. Me ta është Nëna
e Jezusit, Maria, që Biri ia kishte besuar Gjonit. Mblidhen, si një familje e vetme,
me Nënën, rreth Saj. Në pritje. Presin ta shohin përsëri mes tyre Zotin:
“Jezus,
ndihmona të shikojmë shpirtin tonë, në fytyrën tënde. Eja përsëri ndërmjet nesh në
orën e zgjimit, si pate premtuar: “Ku dy a tre janë mbledhur në emrin tim, Unë
jam ndërmjet tyre”.
Para syve të të krishterit hapet në dy kanatat, porta
e shpresës: Jezusi u ngjall! Vërtet u ngjall! Ata, që hynë të parët në varr, panë
si hapeshin ndër mure miliona sy. Sy që do të lartoheshin kah Kryqi, atë ças, e deri
në mbarim të kohëve. I panë, e gjetën fillin e mendimit, që u lindi si fjalë në
buzë: fjalë e thënë në të gjitha gjuhët e botës, gjuhë që s’i dinin, por që do t’i
mësonin, duke u nisur në të katër anët rruzullimit, për të kumtuar lajmin e madh,
të mirë: “Mos e kërkoni Zotin në gropën e akullt! Jezusi u ngjall, jeton përgjithmonë.
Vdekja nuk ka më pushtet mbi Të!”. Fjala e Tij- zjarmi i rroposi gurët e burgut
të kohës e të mëkatit. Krishti i ngjallur na shoqëron në udhën tonë tokësore,
deri në fund, duke na ndihmuar ta mbartim me gëzim kryqin e dhimbjeve e të trazirave
të familjve tona, deri sa ta kapërcejmë pragun e portës së shpresës, vargan, etër,
bij, nipër, të gjithë së bashku, pa frikën e vdekjes, pa tmerrin e ndarjes, nën dritën
e Diellit të jetës, që nuk njeh perëndim.