Pashkët luten në Malsí të Madhe, të thuesh si në Dukagjin, pá ndo’i ndryshim
me randsí. – Të Shtunden e Madhe bekojn bukë (nji pogaçë të laracueme
a të shkrueme), voe, djathë, krypë, kollomoqa. – Të Diellen
e Pashkvet gjindja e shpís çohen heret e, mbasi lahen e ndërrohen, hanë të bekuemen,
qi lêhet permbi nji trevezë. Seicilli bân kryq perpara e han dý-trí kashatë prej së
bekuemes; mandej bashkohen të gjith, merren ngrykë njêni me tjetrin, e bâjn urime;
ulen e rrijn, pijn kafe, ziejn mâzë e hán cillë. Per Pashkë, në shêj gëzimit, ngjýjn
voe me bojë të kuqe, e jua falin fëmijve e miqve. Ata, qi kanë pasë ndo’i dekë n’atë
vjetë, i ngjýjn voet me bojë të zezë. – Per Pashkë nuk ka kenë zakon me pré berr;
por tash nder shum katunde kanë nisë me pré berre. Perpara thohej, se çobajt e mbajshin
per shêj të keq me pré berr per Pashkë, per arsye se n’atë ditë nuk duhej me
hî në vathë, ndersá tash thohet: mjaft mos me hî në vathë me voe në xhep, pse nuk
i gjên gjâ dhenët. Fëmijët luejn njêni me tjetrin, a tuj u thye voesh, ja tuj e gjuejtë
voen per së largut. – Malsorët per Pashkë shetisin fort te njêni tjetri, e pijn e
këndojn. – Kah mjesdita mandej shkojn në Meshë. Në të dyten ditë të Pashkvet
ká kenë zakon me u mbledhë te Kisha i madh e i vogel. Mbas Meshet u bâte logu,
dmth delshin këcimtarët e vallzojshin. - Per këcim delte zakonisht nji djalë i lidhun
e nji grue e zhdervjelltë. – Këcimi bâhej me ruba e pá. Në këcim paraqitej të marrunt
e grues per fat me veletí. – Djali merrte mbrapa gruen me lëvizje të matuna; e grueja
i hikte e i qitte pengime me rubë e tuj bredhë në mënyrë të hijshme e pá të keq. Në
mbarim të këcimit, qi mund të ngëjasë nji gjysë ore a edhe mâ, grueja dorzohej, e
atëherë burri qitte pushkë. – Gëjatë këcimit të gjith rríjshin rreth e perçark e
shikjojshin e u argtojshin, pá këndue e pá u rá veglave. – Mbas kësaj çfaqje delshin
zakonisht edhe dy burra me ka ‘i thuper në dorë, tuj bâ si të dojshin me u pré me
tagana. Marrë nga “Zakone e doke shqiptare”, Át Donat Kurti, Botime Françeskane
Shqiptare, 2010, fq 203- 204