“L’Osservatore Romano” пра венгерскага кардынала-дысыдэнта
У Вялікі Чацвер, калі
Касцёл успамінае ўстанаўленне Хрыстом сакрамэнту святарства, “L’Osservatore Romano”
прысвяціла адзін са сваіх артыкул постаці выдатнага венгерскага пастыра арцыбіскупа
Эстэргом-Будапешцкага кардынала Ёжэфа Міндсэнсці. Іерарх прайшоў складаны шлях праз
пераслед і зняволенне. Яго арыштоўвалі ад тры разы. Спачатку нацысты за дапамогу польскім
бежанца, а затым ужо камуністы ў 1948 г. Хаця апошнія неўзабаве выпусцілі іерарха,
у 1949 г. ён быў зноў арыштаваны, фальшыва абвінавачаны ў здрадзе Радзіме і асуджаны
на пажыццёвае зняволенне. Кардынала Міндсэнсці вызвалілі паўстанцы ў 1956 годзе, у
часы так званай Венгерскай рэвалюцыі. Пасля ўваходу савецкіх войскаў у Будапешт, кардынал
схаваўся ў амерыканскім пасольстве, у якім быў вымушаны прабываць затым на працягу
15 гадоў. Толькі ў 1971 г., дзякуючы асабістаму ўдзелу папы Паўла VI, ён атрымаў магчымасць
пакінуць тэрыторыю пасольства, без права працаваць у Венгрыі. Кардынал выехаў у Рым,
а затым у Вену, дзе і памёр 6 мая 1975 г.
Пасля падзення ў Венгрыі камуністычнага
рэжыму ў 1989 г., Вярхоўны Суд краіны пачаў разгляд справы аб рэабілітацыі гэтага
іерарха і тысяч іншых несправядліва асуджаных. Працэс закончыўся у 1990 г., аднак
поўная юрыдычная, маральная і палітычная рэабілітацыя кардынала адбылася толькі 27
сакавіка 2012 г., на просьбу цяперашняга арцыбіскупа Эстэргом-Будапешцкага кардынала
Пэтэра Эрдо. Ён адзначыў, што “такім чынам закончылася доўгая гісторыя поўная пакут”,
якая “паспрыяе веданню праўды аб мінулым, духоўнаму аздараўленню і маральнаму аднаўленню
венгерскага народа”. “Гэта рашэнне сведчыць аб тым, што нашы заканадаўцы парвалі з
цяжкай спадчынай фальшывых судовых працэсаў і сур’ёзна намагаюцца рэалізоўваць фундаментальныя
чалавечыя патрабаванні справядлівасці”, - сказаў арцыбіскуп Эстэргом-Будапешцкі.