Le të ndalemi te çastet më të rëndësishme të së Enjtes, së Premtes e të së Shtunës
së Shenjtë e Madhe të Pashkëve, për të kuptuar, pranuar, kremtuar e jetuar mesazhin
e shpresës së Jetës që na dhurohet në Jezu Krishtin. Urrejtja, përçarjet, dhuna,
mëkati, vdekja nuk e thonë kurrë fjalën e fundit në ngjarjet e historisë. Me këto
fjalë Kisha duke reflektuar mbi Triditshen, që i paraprin Pashkëve, e vënë në dukje
me forcë vlerën e amshuar të fitores së Krishtit mbi vdekjen. Qielli e toka, dy
përmasat e pandara të mesazhit të krishterë, bëhen më të dukshme se kurrë në Triditshin
e Pashkëve, që Kisha e quan “thelb i fesë së krishterë”; “zemër e strumbullar i tërë
vitit liturgjik”; “ditë e pashembullt’, në të cilën besimtari ngjitet në Kalvar, zbret
në varr e rigjallet me Krishtin e Gjallë. Kështu pra, gjatë këtyre ditëve liturgjia
e shenjtë na propozon me radhë edhe simbolikën e ditëve të kësaj Jave së Shenjtë e
të Madhe të Pashkëve, e cila që nga e Enjtja e Madhe e deri të Dielën e ardhshme të
Bardhë të Ngjalljes, do të rikujtojë orët e fundit të jetës tokësore të Jezusit dhe
mesazhin e ngadhënjimit të Jetës. Nga bekimi i vajrave të shenjta, në Meshën e
Bagmit, që kremtohet të Enjten e Madhe, tek kremtimi i Darkës së Mbrame të Zotit Jezus,
gjatë së cilës Krishti i dhuron Kishës në fasha ‘ilaçin e pavdekësisë”, Eukaristinë.
Më pas liturgjia na flet për misterin e dhimbjes e të vdekjes, që ndjehet fuqimisht
të Premten e Madhe: rast i përshtatshëm për të medituar mbi misterin e madh të së
keqes e të mëkatit, që peshon rëndë mbi njerëzimin. E për ta kuptuar këtë mister,
na ndihmojnë shumë edhe manifestimet e përshpirtërisë popullore, si Udha e Kryqit
apo shfaqjet tjera kishtare, të cilat synojnë të lenë gjurmë sa më të thella në shpirtin
e besimtarëve, duke u krijuar përshtypjen e pjesëmarrjes së drejtpërdrejtë në flijimin
e Jezusit. E kështu, deri në heshtjen e thellë të së Shtunës së Madhe, në të cilën
zhyten të gjitha Kishat, me elterët e zhveshur nga stolitë, duke e ftuar besimtarin
t’ia hapë shpirtin mëshirës së pakufishme Hyjnore. Ka rëndësi të madhe në këtë
ditë pjesëmarrja në sakramentin e rrëfimit, rrugë e domosdoshme për të pastruar zemrën
e për t’u përgatitur që t’i kremtojmë Pashkët me shpirt të përtrirë. Së paku një herë
në vit, kemi nevojë për këtë përtëritje të shpirtit tonë. Misteri i mundimeve dhe
i vdekjes së Jezusit mbi Kryq, që rijetojmë në Javën e Madhe të Pashkëve, na ndihmon
ta ndjejmë thellë tërë vlerën dhe bukurinë e jetës në dritën e Krishtit të Gjallë,
të Dielën e Pashkëve. E kujtimi dhe rkemtimi i këtyre mistereve njëkohësisht,
do të thotë edhe t’i jetosh si ngjarje të së sotmes së historisë, me bindjen se gjithçka
kremtojmë, është realitet i gjallë e aktual. Ta bëjmë, pra, të pranishme në lutjen
tonë, edhe dramaticitetin e fakteve e të situatave që ende sot trondisin shumë nga
vëllezërit tanë në të katër anët e botës. E dimë se urrejtja, përçarjet, dhuna, nuk
e thonë kurrë fjalën e fundit në ngjarjet e historisë. Këto ditë në shpirtin tonë
lind shpresa e madhe: Krishti i kryqëzuar u Ngjall, e mundi botën, e mposhti vdekjen.
Dashuria, që është më e fortë se urrejtja, fitoi, e prandaj edhe ne duhet të marrim
pjesë në gëzimin e fitores së Dashurisë. Duhet të nisemi nga Krishti Gjallë e të
punojmë në bashkim me Të për një botë që ngrihet mbi themelet e paqes, të drejtësisë
e të dashurisë. T’i kërkojmë Hyjit të gjithëpushtetshëm, burimi i jetës dhe dritës,
t’i ndriçojë mendjet e zmmrate e të gjithëve dhe t’na japë forcë e guxim të zgjedhin
rrugën e jetës e të vëllazërimit. Në këtë synim na ndihmon shembulli i Virgjërës
Mari, që nuk pushoi kurrë s’e kundruari fytyrën e Birit të saj, Jezusit. Të lutemi
që Zoja Bekuar të ndërmjetësojë për secilin prej nesh pranë Hyjit, e të kremtojmë
vërtetë ringjalljen tonë në Ngjalljen e Jezu Krishtit e kështu t’i kremtojmë Pashkët
e Bardha!