Վրաստանի Հայ Համայնքի Դիմումը՝ Թիֆլիսի Մէջ Հայոց Ցեղասպանութեան Նուիրուած Յուշաքար
Տեղադրելու Խնդրանքով .....
«Վրաստանի Հայ Համայնք»ը դիմած է Թիֆլիսի քաղաքապետարանին եւ Քաղաքային խորհուրդին (օրէնսդիր
մարմնին)` խնդրելով թոյլ տալ մայրաքաղաքի մէջ տեղադրել յուշաքար` նուիրուած 1915-23-ին
Հայոց Ցեղասպանութեան զոհերու յիշատակին: Այս մասին կը տեղեկանանք «Վրաստանի հայ համայնք»ի
մամուլի ծառայութեան տարածած հաղորդագրութենէն: «Մենք, Վրաստանի հայ քաղաքացիներս,
թիւով Վրաստանի մէջ երկրորդ, Թիֆլիսի մէջ` առաջին ազգային փոքրամասնութիւնն ենք: Հակառակ
բազմաթիւ դիմումներու եւ խնդրանքներու, առ այսօր 1915-23-ին Հայոց Ցեղասպանութեան զոհերուն
նուիրուած ոչ մէկ յուշարձան-խորհրդանիշ Թիֆլիսի մէջ չունինք: Մենք` ներքոստորագրեալներս,
կը խնդրենք հաշուի առնել մեր արդար ցանկութիւնը եւ Համայնքին իրաւունք տալ 1915-23-ին
Հայոց Ցեղասպանութեան զոհերուն նուիրուած յուշաքար տեղադրել»,- ըսուած է դիմումին մէջ: Դիմումին
տակ ստորագրած են «Վրաստանի Հայ Համայնք»ը (ՎՀՀ), «ՎՀՀ Ուսանողական միութիւն»ը, «ՎՀՀ
Երիտասարդական միութիւն»ը եւ «ՎՀՀ Պատանեկան միութիւն»ը: Նշենք որ առաջին անգամ
չէ որ նման խնդրանք մը կը ներկայացուի սակայն Թիֆլիսի քաղաքապետարանը կ'անտեսէ 1915-23-ի
Հայոց Ցեղասպանութեան զոհերուն նուիրուած յուշարձան ունենալու` Թիֆլիսահայերուն փափաքը: