Kardinali Komastri në Meshën për punonjësit e Vatikanit: “Juda, rrezik gjithnjë i
pranishëm në Kishë”.
Kardinali Anxhelo Komastri, mëkëmbës i përgjithshëm i Papës për Qytet-Shtetin e Vatikanit,
kryesoi sot paradite, në Bazilikën e Shën Pjetrit, Meshën Shenjte për punonjësit e
Vatikanit, në prag të Triditshes së Pashkëve. Në homelinë e rastit, kardinali komentoi
Ungjillin e ditës, që flet për tradhtinë e Judës, atij që shtirej si apostull, madje,
më i devoçmi ndërmjet të Dymbëdhjetëve. Ndërsa ishte tradhtari. Ishte ai, që e shiti
Mësuesin për 30 aspra, e i dha puthjen më tradhtare, që njeh historia, gjithnjë tragjike
e njerëzimit. Puthjen e gjarpërit. Predikatari vijoi të fliste për tradhtarin fodull,
të etur për para e për hakmarrje e t’u kujtojë besimtarëve se fantazma e Judës vijon
të endet mbi botën e mbi fatin e njeriut, që mund ta tradhtojë edhe sot Zotin, të
tradhtojë mirësinë, përvujtërinë, dashurinë: “Juda është gjithnjë i pranishëm
në historinë e Kishës; rrezik real për këdo. Don Primo Maxolari, me realizëm të mprehtë,
një ditë pati thënë: “Rreth çdo Sofre eukaristike rri në pritë hija e Judës. Duhet
t’i hapim mirë sytë, që hija e tij të mos bëhet një me tonën!”. Të ruhemi
nga hija e Judës - theksoi predikatari, duke kujtuar, më pas, se ashtu si mund të
bëhemi, edhe mund të mos bëhemi juda. Po si? Duke e matur vazhdimisht sjelljen tonë
me metrin e së vërtetës, që është Jezusi. Duke ecur mbi gjurmët e tij, e kuptojmë
kush jemi, përkrah kujt e në ç’rrugë duhet të ecim, për të mbërrijtur te caku: “Jezusi
është ilaçi më i mirë për sëmundjet tona shpirtërore; Jezusi është mirësia, që iu
afrua ligësisë sonë, për ta mjekuar, për ta shëruar. Jezusi është Zoti, që shpëton!
Këtë kuptim ka emri i Tij. Po si mund të ndodhë mrekullia e shërimit tonë shpirtëror?
Si është e mundur të shërohemi nga sëmundja më e neveritshme, ligësia e shpirtit njerëzor?
Ka vetëm një rrugë: pendimi! Pendimi i hap Zotit hapësirën e nevojshme në shpirtin
tonë, që ai të zbresë ndër ne, të na shërojë e të na bëjë të lum”. Më pas,
kardinali u drejtoi besimtarëve një pyetje: “Po a jemi penduar sinqerisht për mëkatet
tona?I kemi rënë vërtetë mohit ligësisë së zemrës, fodullëkut, mendjemadhësisë, arrogancës,
hakmarrjes, egoizmit të tërbuar, shkatërrimtar për shpirtin, që e ka, e shpirtërat
për rreth? Duam vërtet të mjekohemi, të shërohemi, të shpëtohemi nga Jezusi? Jemi
vërtet gati?”. Se sa jemi gati, këtë e tregon zbatimi i urdhërimit më të madh të Jezusit
për njeriun: “Duaje të afërmin, si vetveten!”. Zoti na la trashëgim dashurinë e sinqertë,
të vërtetë, të njeriut për njeriun: “Nga kjo do ta dinë se jeni dishepujt
e mi: nga dashuria njëri për tjetrin. Në se ju mungon kjo dashuri, askush nuk do t’ju
besojë se jeni të krishterë. Zoti na jep mundësinë t’i hapim zemrat e ta pranojmë
dhuratën e dashurisë. Ta pranojmë, pra, e me përvujtëri, sepse kemi tepër pak mirësi,
tepër pak përvuajtëri, tepër pak dashuri. Prandaj nganjëherë nuk e ndjejmë praninë
e Jezusit ndër ne. E po për këtë arsye ua fshehim Zotin edhe atyre, që na rrethojnë
e që duan t’i afrohen, për ta takuar”. Në përfundim, kardinali Komastri
iu lut Zotit, që këto Pashkë të reja:“.. të na shkundin fort, ta shembin murin
e krenarisë sonë kallpe, të kundërshtimit tonë e të na bëjnë të aftë për t’ia marrë
nga Dora Jezusit ibrikun e larjes së këmbëve, që na e la trashëgim. Në se do të bëjmë
kështu, do të ndjejmë të na mungullojë në shpirt gëzimi i Shën Françeskut të Asizit,
gëzimi i Nënë Terezës dhe i të gjithë dishepujve të vërtetë të Zotit”.