Патрыярх Барталамей І занепакоены антыэкуменічнымі настроямі ў Царкве Грэцыі
Патрыярх Канстантынопальскі
Барталамей І выказаў заклапочанасць і смутак з прычын антыэкуменічных заяваў некаторых
грэцкіх праваслаўных іерархаў. У лісце да архіепіскапа Афінскага і ўсёй Грэцыі Гераніма
ён выказаў занепакоенасць, што такое стаўленне “можа паставіць пад пагрозу адзінства
Царквы ў цэлым і адзінства Праваслаўнай Царквы ў прыватнасці”. Прычынай заявы сталі
паводзіны некаторых грэцкіх праваслаўных біскупаў, якія ў апошнія дні паддалі крытыцы
Царкву Грэцыі за ўдзел у міжнародным экуменічным руху і правядзенне праваслаўнымі
двухбаковых і шматбаковых тэалагічных дыялогаў з хрысціянамі іншых канфесій.
Духоўны
лідэр сусветнага праваслаўя заявіў у сваім лісце, што да гэтага часу заявы крытыкуючыя
экуменізм з’яўляліся ў Царкве Грэцыі ў “абмежаваным маштабе”, але тое, што адбылося
ў апошні час, “дасягнула непрымальнага ўзроўню”. Барталамей І спасылаецца на нядаўнюю
паставу Мітрапаліта Пірэй Серафіна, які 4 сакавіка паддаў анафеме папу Бэнэдыкта XVI
і “тых, хто з ім”, а таксама пратэстантаў, прыхільнікаў і ўдзельнікаў экуменічнага
руху, а таксама юдэяў і мусульман. Гэта адбылося падчас літургіі ў першую нядзелю
Вялікага Посту, якая таксама называецца Нядзеляй Трыумфу Праваслаўя.
Патрыярх
Канстантынопальскі заклікаў арцыбіскупа Афінскага і Святы Сінод Грэцкай Царквы, які
ён узначальвае, афіцыйна абвергнуць і асудзіць гэтыя неапраўданыя і небяспечныя заявы
і дзеянні. Па словах Патрыярха, яны знаходзяцца ў супярэчнасці з рашэннямі, прынятымі
сумесна Праваслаўнымі Цэрквамі. Прадстаяцель напісаў, што “маючы на ўвазе адказ і
афіцыйную пазіцыю Царквы Грэцыі, пакідае за сабой права прыняць меры на агульнаправаслаўным
узроўні, каб прадухіліць паўтарэнне падобнай сітуацыі”.