I Lumi Papa Gjon Pali II në fjalët e Benediktit XVI
Sot më 2 prill Kisha përkujton shtatë vjetorin e vdekjes së Papës Gjon Palit II, ndërsa
kujton plot emocion Lumturimin e tij, kremtuar më 1 maj të vitit të kaluar në Vatikan.
Të shumta, nismat përkujtimore edhe sivjet, që kanë në qendër figurën madhore të të
Lumit të ri Karol Vojtila. Për trashëgiminë e tij të jashtëzakonshme vazhdon të flitet
ku në botë në institucione kishtare, shoqërore, akademike, kulturore e politike e
sidomos ndër popull të Zotit. E pikërisht për të njohur e për të zbuluar sa më shumë
e nga afër trashëgiminë e këtij Pape të Madh, po kthehemi mbrapa me kujtesë e të dëgjojmë
fjalët e kardinalit të asaj kohe Racinger, e pastaj, edhe të vetë Gjon Palit II, që
na kujtojnë vdekjen dhe shenjtërinë e Karol Vojtilës: “Eja pas meje!”.
Ç’gjë të jashtëzakonshme na la trashëgim Gjon Pali II? Gjatë salikimeve, kremtuar
në Sheshin e Shën Pjetrit, më 8 prill 2005, ndërsa populli i Zotit nisi ta quante
‘Shenjt’, kardinali dekan i asaj kohe, Jozef Racinger, nënvizoi se Papa Wojtila i
qe përgjigjur gjithnjë thirrjes së Zotit. “Eja pas meje!”. Karol Vojtila
eci pas Zotit në vitet e tmerrshme të luftës e të diktaturës, duke kapërcyer mijëra
vështirësi. Eci në gjurmët e Zotit si i ri, si meshar, si ipeshkëv e në fund, si pasardhës
i Shën Pjetrit. Gjon Pali II, vërejti miku e bashkëpunëtori i tij i ngushtë, “u bë
një gjë e vetme me Krishtin, Bariun e mirë, që i do fort delet e veta”: “Dashuria
e Krishtit qe forca sunduese e Atit tonë të Shenjtë; kush e ka parë kur lutej, kush
e ka dëgjuar kur predikonte, e di mirë këtë. E kështu, falë kësaj rrënjosjeje në Krishtin,
ai mundi të mbartë një barrë që i kapërcen forcat njerëzore: mundi të jetë Bari i
grigjës së Krishtit, i Kishës së Tij universale”. Eja pas meje! Së
bashku me mandatin për të kullotur grigjën e vet – pati nënvizuar Kardinali Jozef
Racinger - Krishti i kumtoi Pjetrit edhe martirizimin e tij. Në periudhën e parë të
papnisë, Ati i Shenjtë, ende i ri e përplot me forca, i udhëhequr nga Krishti, do
të shkonte deri në skajet më të largëta të botës. Por më pas, gjithnjë më tepër, hyri
në bashkim me mundimet e Krishtit. E pikërisht në këtë bashkim me Zotin e munduar,
e kumtoi pa u lodhur kurrë e me thellësi të re Ungjillin, misterin e dashurisë, që
shkon deri në fund të fundit. Papa vuajti e deshi në bashkim me Krishtin e prandaj
edhe mesazhi i vuajtjes së tij e i heshtjes së tij ishte aq i kuptueshëm e aq i frytshëm. Më
pas, fjalët plot emocion, drejtuar Papës së dashur Vojtila, duke i kërkuar, nga qielli,
bekimin e Tij: “Mund të jemi të sigurt se Papa ynë i dashur, tani në dritaren e
shtëpisë së Atit Qiellor, na shikon e na bekon. Po, bekona, o Atë i Shenjtë. Ne po
ia besojmë shpirtin tënd të dashur Nënës së Hyjit, Nënës tënde, që të udhëhoqi çdo
ditë e të udhëheq edhe tani në lumturinë e amshuar të Birit të saj, Jezu Krishtit,
Zotit tonë. Amen!”. E Jozef Racinger, tani Papa Benedikti XVI, në Meshën e
fillimit të papnisë së tij, ia besoi përsëri veten mbrojtjes së Paraardhësit Vojtila,
duke iu drejtuar, me emocion të thellë, ndërsa niste të ecte në gjurmët e Tij: “Akoma
e vazhdimisht më jehojnë në veshë fjalët e tij:“Mos kini frikë! Hapjani, dy
kapakësh, portat Krishtit – e do të gjeni të vërtetën”. “Mos kini frikë!
Hapjani, madje dy kapakësh, portat Krishtit!”. Këtë thirrje Papa Vojtila na e
përsërit me forcë të madhe e me bindje të madhe, duke u nisur nga përvoja e një jete
të gjatë personale. Mos kini frikë nga Krishti! Ai nuk merr asgjë e jep gjithçka.
Kush i dhurohet atij, merr njëqind fish më tepër. Po, hapjani, dy kapakësh, portat
Krishtit – e do të gjeni të vërtetën! Të vërtetën që na bënë të lirë e na shpëton
përjetësisht. Gjon Pali u lartua në nderime të elterit më 1 maj 2011 në Vatikan
nga Papa Benedikti XVI. Dy Papë, dy shërbëtorë të Kishës së Zotit, dy miq të ngushtë,
dy personalitete tejet të lidhur ndërmjet tyre, edhe në udhëheqjen e popullit të Zotit
udhës së Mësuesit Hyjnore, Krishtit Zot e Shpëtimtar.