Упершыню “Місійны тыдзень” папярэдзіць Сусветныя дні моладзі

Сусветныя дні моладзі ў Рыа ў 2013 г. упершыню папярэдзіць “Місійны тыдзень”. Сотні тысяч пілігрымаў, перад тым як прыехаць ў Рыа дэ Жанейра, накіруюцца ў бразільскія дыяцэзіі, дзе правядуць каля тыдня. Кс. Джэферсан Гансалвес, галоўны арганізатар мерапрыемстваў, якія папярэднічаюць Сусветным дням моладзі, паведаміў, што ў Бразіліі не будзе традыцыйных “Дзён у дыяцэзіях”. Замест іх 17-20 ліпеня 2013 г. пройдзе “Місійны тыдзень”. Ён дасць маладым людзям магчымасць паўдзельнічаць у душпастырстве, салідарнай працы з мясцовымі супольнасцямі, а таксама місійных і культурных мерапрыемствах. На думку арганізатараў, “Місійны тыдзень” дасць моладзі больш аўтэнтычнага досведу аб жыцці ў Бразіліі.

Рашэнне пераўтварыць “Дні ў дыяцэзіях” у “Місійны тыдзень” прыняў кардынал Станіслаў Рылка, старшыня Папскай рады па справах свецкіх, у ходзе візіту ў Рыа дэ Жанейра ў лютым 2012 г.

Кс. Гансалвес выказаў спадзяванне, што мерапрыемства “пакіне ў спадчыну наступным Сусветным дням моладзі вопыт місійнай актыўнасці маладых людзей”.

На гэтым тыдні каля 300 адказных за моладзевае душпастырства з усяго свету сабраліся ў італьянскім Рокка дзі Папа, каб абмеркаваць планы на Сусветныя дні моладзі ў Рыа.