Udhë Kryqi me të burgosurit e Rebibbia. Papa: Jezusi është me ne, fjalën e fundit
e ka drita e dashurisë së Zotit.
Udhë Kryqi me të burgosurit e Rebibbia. Papa: Jezusi është me ne, në udhën tonë të
kryqit; fjalën e fundit e ka drita e dashurisë së Zotit. Karitasi dioqezan romak organizoi,
sot pasdite, një Udhë Kryqi, së bashku me të burgosurit e burgut Rebibbia, në kuadrin
e nismave të Kreshmëve, që sivjet në këtë burg, u quajtën “Kreshmët e dashurisë”,
duke pasur parasysh vizitën e Benediktit XVI. E pikërisht Papa u drejtoi të burgosurve
një mesazh, përmes të cilit shprehu kënaqësinë për këtë Udhë Kryqi, kryesuar nga Mëkëmbësi
i Atit të Shenjtë për Romën, kardinali Agostino Valini, me pjesëmarrjen e të burgosurve,
punonjësve të burgut dhe besimtarëve nga famulli të ndryshme. Jam pranë jush
në këtë nismë, shkruan Papa, sepse në zemrën time është i gjallë kujtimi i vizitës,
që bëra para Krishtlindjes në burgun e Rebibbias. Kujtoj fytyrat tuaja, që i njoha
nga afër, e fjalët, që më thatë, të cilat kanë lënë një gjurmë të pashlyeshme në shpirtin
tim. Bashkohem, prandaj, me lutjen tuaj, duke e shikuar si vazhdimësi të pranisë sime
mes jush. E di se kjo Udhë Kryqi kremtohet edhe si shenjë pajtimi. E kjo, sepse,
siç më pati thënë një nga të burgosurit, burgu të shërben edhe për t’u ngritur në
këmbë, pasi të jesh rrëzuar; për t’u pajtuar me vetveten, me të tjerët e me Zotin
e për të hyrë përsëri në radhët e shoqërisë. Kur Krishti rrëzohet, e jo një herë,
por, dy, tri, e kuptojmë mirë se ai deshi të provojë rëniet tona, të marrë mbi vete
barrën e mëkateve tona, sepse janë ata, që e bëjnë të rrëzohet. Jezusi ra tri herë
– kujtonte mesazhi i Papës - por tri herë u ngrit përsëri në këmbë e vijoi rrugën
drejt Kalvarit; e kështu edhe ne, me ndihmën e tij, mund të ringrihemi pas rënieve
tona, ose mund të ndihmojmë ndonjë vëlla, që të ngrihet. Por, ç’i jepte Jezusit
forcë të ecte përpara? Siguria se Ati ishte me të! Ndonëse e ndjente në zemër hidhërimin
e braktisjes, Jezusi e dinte se Ati e donte, e pikërisht kjo dashuri e pakufishme,
kjo mëshirë e pafundme e Atit qiellor, e ngushëllonte e ishte pambarimisht më e madhe
se dhuna e poshtërimet, që e rrethonin. Edhe pse të gjithë e përçmonin dhe e trajtonin
si të mos ishte njeri, Jezusi, në zemrën e vet, e dinte me siguri se ishte biri, Biri
i dashur i Hyjit Atë. Kjo është dhurata e madhe, që na fali Jezusi me Udhën e Tij
të Kryqit: na tregoi se Hyji është dashuri e pambaruar, është mëshirë e e mbart deri
në fund të fundit barrën e padurueshme të mëkateve tona, që të mund të ngrihemi përsëri,
të pajtohemi e të gjejmë paqen. Kjo nënvizohej në mesazhin papnor, që u kujtoi
të burgosurve se kështu as ne nuk kemi frikë ta përshkojmë ‘udhën tonë të kryqit”,
ta mbartim kryqin bashkë me Jezusin. Ai është me ne. E me ne është edhe Maria, Nëna
e Tij dhe e jona. Maria, vijonte mesazhi, duke krijuar atmosferën e Javës së Madhe,
që po afrohet, pikërisht në mjediset e një burgu, ku fjalët rrahje; rrëzim, kamxhik,
poshtërim, tallje, britma, gjak, tingëllojnë dhimbshëm, si dymijë vjet më parë në
vise shumë larg nga burgu romak, ishte pranë, është pranë. Zoja e Bekuar ishte me
Të, është me ne. Besnike edhe tek këmbët e kryqit, lutet dhe për ringjalljen tonë,
duke besuar plotësisht se edhe në natën më të errët, fjalën e fundit e ka drita e
dashurisë së Zotit.
“Sot do të jesh me mua në Parajsë” – ishte tema
e zgjedhur për Udhën e Kryqit, që u kremtua, në orën 16.30, në kompleksin e ri të
Burgut Rebbibia, ku u lexua mesazhi i Papës, ndërsa kremtimi ishte meditim për Parajsën
e vendi, ku kremtohej, sheshi para kapelës së burgut, me emrin “Zoti, Ati ynë”.Në
përfundim të kremtimit, si simbol i paqes e i pajtimit, nga hekurat e burgut fluturuan,
të lirë, tre pëllumba të bardhë!