Kremtimet e Javës së Madhe 2012, që do të kryesohen nga Benedikti XVI
Me Javën e Shenjtë ose Javën e Madhe, siç quhej në shekullin IV në Egjeri e
siç quhet edhe sot e kësaj dite ndër shqiptarë – përfundojnë Kreshmët e hyjmë në kremtimet
e Pashkëve. Zyra e Kremtimeve liturgjike publikoi programin e kremtimeve të Javës
së Madhe që do të kryesohen nga Ati i Shenjtë.
Java e Madhe do të nisë me
të Dielën e Larit, më 1 prillin e ardhshëm, e do të arrijë kulmin me Triditshën
e Pashkëve, qendër e gjithë vitit liturgjik. Në Javën e Madhe, Kisha kremton misteret
e shëlbimit: “Vepër e shpërblimit e kryer nga Krishti i cili, duke vdekur, e mundi
vdekjen e, duke u ngjallur, na dha përsëri jetë ne të gjithëve”. Benedikti XVI
do t’i kryesojë të gjitha ritet e Javës së Madhe, duke filluar nga 1 prilli i ardhshëm
në orën 9.30 me Meshën në Sheshin e Shën Pjetrit për të Dielën e Larit e të Mundimeve
të Zotit. Kjo datë përkon me Ditën XXVII Botërore të Rinisë me temë “Gëzohuni
gjithmonë në Zotin!”(Fil4,4), që do të kremtohet në nivel dioqezan.
Para se të fillojë proçesioni eukaristik, Ati i Shenjtë do të bekojë larin, palmat
e degët e ullinjve, ndërsa në përfundim të proçesionit, do të kremtojë Meshën Shenjte
të Mundimeve të Krishtit.
Të Enjten e Madhe, më 5 prill 2012, duke nisur
nga ora 9.30, Shenjtëria e Tij do të kryesojë bashkëkremtimin e Meshës së Bagmit në
Bazilikën e Vatikanit. Gjatë kremtimit do të bekohet vaji i katekumenëve dhe i të
sëmurëve. Bashkëkremtimi i Papës me kardinajtë, ipeshkvijtë e meshtarët e pranishëm
në Romë do të jetë simbol i bashkimit të ngushtë ndërmjet Kryebariut të Kishës universale
dhe bashkvëllëzërve të tij në meshtari.
Triditshja e Mundimeve dhe e Ngjalljes
së Zotit, ‘kulm i gjithë vitit liturgjik’ do të fillojë meMeshën e Darkës
së Fundit të Krishtit, që Papa do ta kremtojë duke nisur nga ora 17.30 në bazilikën
e Shën Gjonit në Lateran. Benedikti XVI do t’u lajë këmbët 12 burrave. Gjatë ritit,
të pranishmëve do t’u drejtohet ftesa për të bërë një akt bamirësie si ndihmë humanitare
për refugjatët sirianë. Shuma që do të mblidhet do t’i dorëzohet Atit të Shenjtë
në çastin e paraqitjes së dhuratave.
Të Premten e Madhe, më 6 prill,
në orën 17.00, Shenjtëria e Tij do të kryesojë, në Bazilikën e Vatikanit, Kremtimin
e Mundimeve të Zotit me ritin e Adhurimit të Kryqit e pastaj, në mbrëmje, në orën
21.15, Udhën tradicionale të Kryqit në Koloseum, në përfundim të së cilës do
të përshëndesë besimtarët dhe do të japë bekimin e tij apostolik. Sivjet Benedikti
XVI ia besoi një çifti bashkëshortësh tekstet e meditimeve për Udhën e Kryqit: quhen
Danilo e Ana Maria Xanxuki. Janë nismëtarë të lëvizjes “Familje të reja”, në mjediset
e Fokolarëve. Reflektimet do të frymëzohen nga jeta e familjes. Skema e Udhës së Kryqit
do të jetë ajo tradicionale, me 14 stacione.
Të Shtunën e Madhe, ndërmjet
7-8 prillit, në orën 21.00 Benedikti XVI do të kryesojë kremtimin e Natës së Pashkëve
në Bazilikën e Vatikanit. Sipas traditës, kjo natë në të cilën Krishti u ngjall njihet
si ‘Nëna e të gjitha netëve të lutjes’, prandaj edhe kalohet në uratë. Kisha rri zgjuar
duke pritur Ngjalljen e Zotit me kremtimin e sakramenteve fillestare të jetës së krishterë.
Kremtimi do të nisë me ritin e bekimit të zjarrit të ri në tremen e Bazilikës e do
të vijojë me ndezjen e qiriut të Pashkëve e me Exsultet, pasuar nga Mesha Shenjte,
e kryesuar nga Benedikti XVI.
Më 8 prill, Solemniteti i Pashkëve, në
orën 10.15, Papa do të kremtojë Meshën e Ditës në tremen e Bazilikës së Shën Pjetrit
e më pas, nga lozha qëndrore e Bazilikës, do të japë Bekimin ‘Urbi et Orbi’ – ‘Romës
e Botës’.
Fillon kështu “Koha e gëzueshme’ e Rrëshajëve, kur Kisha
kremton praninë e Krishtit të ngjallur dhe ndikimin e Shpirtit Shenjt. Këtë vit Pashkët,
ndërmjet tjerash, përkojnë me ditëlindjen e Atit të Shenjtë që pikërisht më 16 prill
mbush 85 vjet: tri ditë më pas, më 19 prill, mbushen 7 vjet nga fillimi i papnisë
së Benediktit XVI.