Atë Kantalamesa: besimtari nuk heq dorë nga arsyetimi, por e lartohet kah Zoti.
Benedikti XVI, që u kthye dje nga Kuba, ndoqi, sot paradite, predikimin e katërt e
të fundit të Kreshmëve, mbajtur, atë Raniero Kantalamesa. Në kapelën e Nënës së Shëlbuesit
të Pallatit Apostolik, në Vatikan, predikatari i Shtëpisë Papnore foli për udhën e
njohjes së Zotit, sipas Gregorit të Nisës, Atë i Kishës Lindore, që jetoi në shekullin
IV. Për të takuar Zotin, shpjegoi rregulltari kapuçin, duke kujtuar mësimet e Nisenit,
duhen kapërcyer kufijtë e arsyes. Kush niset për t’iu afruar Zotit, duhet të besojë
se Ai ekziston: është Shkrimi Shenjt që, në Letrën drejtuar Hebrenjve, na tregon si
mund t’i afrohemi Hyjit; ndërsa Gregori i Nisës pati meritën të shpjegojë se njeriu
mund ta njohë vërtet Zotin e të ketë vegimin e Tij, vetëm kur arrin të shikojë se
Ai është i padukshëm. Pikërisht pranimi i panjohshmërisë së Zotit, është udha për
njohjen e Tij. Por, pse atë Kantalamesa, në predikimin e fundit të Kreshmëve,
plot nxitje për reflektime, zgjodhi pikërisht Gregorin e Nisës si prijës, për njohjen
e atij Zoti, para të cilit jemi si krijesa përballë Krijuesit? Së pari, për të na
shpjeguar se udha e njohjes së Zotit kalon përmes mosnjohjes. Prej këndej, duke kujtuar
Librin e Daljes, predikatari kujtoi se herën e parë Zoti iu duk Mosiut në dritë; më
pas, i foli nga reja, së fundi, kur ai u bë më i përkryer, e pa Zotin në errësirën
e mbrëmjes. Gjithnjë duke u mbështetur mbi shkrimet e Nisenit, komentoi: “…
Kalimi nga errësira, në dritë është shkëputja e parë nga idetë e rreme e të gabuara
mbi Zotin; inteligjenca më e vëmendshme ndaj sendeve të fshehta, duke i prirë shpirtit
përmes sendeve të dukshme, kah realitetet e padukshme, i ngjet resë, e cila errëson
gjithçka shqisore dhe e mëson shpirtin të kundrojë atë, që është e fshehur; së fundi,
shpirti që ka ecur përmes këtyre udhëve drejt sendeve qiellore, duke i pasë lënë sendet
tokësore, aq sa është e mundur për natyrën njerëzore, depërton në shenjtëroren e njohjes
hyjnore(në theognosia-n e famshme), rrethuar në të katër anët prej hijes hyjnore të
Zotit”. Më pas predikatari i Shtëpisë Papnore shpjegoi se në kërkimin e
Zotit nuk përjashtohet arsyeja, mbasi njeriu nuk është i detyruar të zgjedhë ose rrugën
e fesë, ose atë të arsyes: “Duke besuar, njeriu nuk heq dorë nga arsyeja,
por e larton atë, gjë krejt e ndryshme, kjo. Besimtari i thellon burimet e arsyes
së tij, u krijon mundësinë të kryejnë veprimin më të fisëm, sepse, siç pohon Paskal,
akti më i lartë i arsyes, është të pranojë se ka një pafundësi sendesh, që e tejkalojnë
arsyen”. Kjo do të thotë dituri e paditurisë; do të thotë të marrësh vesh,
se nuk mund të kuptosh. E kjo është edhe panjohshmëria e Hyjit, që nuk e poshtëron
aspak njeriun, përkundrazi: “Një panjohshmëri e tillë synon ta mbushë njeriun
me entuziazëm e gëzim: na thotë se Zoti është pambarimisht më i madh, më i bukur,
më i mirë, sesa mund ta marrim me mend; se e gjithë kjo është bërë për ne, që gëzimi
ynë të jetë i plotë, që të mos na shkojë as nëpër mend se mund edhe të mërzitemi,
duke jetuar në shekuj të shekujve pranë Tij”. Nuk është aspak përhumbje,
ajo që ndjen njeriu, i cili hyn në misterin e Hyjit, shtoi Atë Kantalamesa, përkundrazi,
si e quan Gregori i Nisës, është “ndjesia e një pranie”, ndjesi e frikshme e joshëse
njëherësh, që e pushton krejtësisht qenien njerëzore, përballë shfaqjeve të mbinatyrshme
ose mbiracionale. Një prani, që bëhet gjithnjë më e ndryshme, sa më shumë njeriu pastrohet
nga mëkati e nga pasionet. E në se udha e intelektit dhe e shpirtit drejt Zotit duket
e vështirë, nuk duhet harruar se mbi Malin e Kalvarit Njeriu-Zot, Jezusi i Nazaretit,
e bashkoi përgjithmonë njeriun me Zotin!