Kur Gjoni XXIII i foli Kubës përmes Radio Vatikanit
Akoma jehon gëzimi e forca e fjalëve të Benediktit XVI gjatë Meshës së kremtuar në
sheshin e Revolucionit, në Havanë. Por në këtë shesh nuk kanë folur vetëm Papa aktual
e Gjon Pali II, në vitin 1998. Para 53 vjetësh, aty u dëgjua edhe zëri i Papës Gjoni
XXIII, jo i pranishëm fizikisht. Nga larg, Papa Ronkali u fliste kubanëve përmes valëve
të Radio Vatikanit, në një radiomesazh, dëgjuar nga besimtarët e mbledhur në meshën
kulmore të Kongresit I katolik kombëtar dhe të Asamblesë së përgjithshme të Apostullatit
laik. “Habla Radio Vaticana, desde del Palacio Apostólico del Vaticano. Trasmitimos
en audiciones extraordinaria el Radiomensaje de Su Santidad Juan XXIII dirigidos a
los fieles de Cuba”. Kështu lajmërohej radiomesazhi i Gjonit XXIII. Ishte e
dielë, 29 nëntor 1959, pak muaj pas fitores së revolucionit kuban, të udhëhequr nga
Fidel Kastro. Në Sheshin e Revolucionit, besimtarët dëgjonin me emocion – falë Radio
Vatikanit – fjalët e një pape, të Gjonit XXIII, që i përshëndeste nga Vatikani. Ishte
hera e parë, që zëri i një pape arrinte në Kubë. “Fytyra e botës mund të ndryshojë,
nëse mbretëron dashuria e vërtetë; ajo e të krishterit, që bashkohet me dhimbjen e
vuajtjen e të mjerit, që kërkon, për këtë njeri, lumturinë, shëlbimin, njësoj si për
vete; ajo e të krishterit – vazhdon Papa Ronkali – të bindur se të mirat, që zotëron,
kanë funksion shoqëror e se përdorimi i tepricave në favor të atyre, që u mungon edhe
më e nevojshmja, nuk është bujari fakultative, por detyrë”. E akoma, më pas: “Nëse
urrejtja ka dhënë frytet e hidhura të vdekjes, duhet të kalojmë sërish tek ajo dashuri
e krishterë, e vetmja, që mund të limojë kaq ashpërsi, të kapërcejë kaq rreziqe të
mëdha e të ëmbëlsojë kaq shumë dhimbje”. Kjo dashuri mund të konsolidojë paqen
shoqërore, paralajmëronte Papa, i cili u kërkonte institucioneve ta nxisnin bashkëpunimin
ndërmjet njerëzve, duke pasur parasysh se të gjithë janë anëtarë të familjes së madhe
të Zotit, Atit të tyre. Gjithashtu, i bënte thirrje secilit ta jetonte dashurinë e
krishterë, pasi prej kësaj do të varej paqja në Kubë e ruajtja e traditave të saj
katolike. Koha tregoi sa të drejta ishin mësimet e Papës, të cilat Kuba, fatkeqësisht,
nuk i ndoqi.