Ceremonia e lamtumirës nga Meksika. Papa uron: Mbetshi me Tënzonë!
Benedikti XVI sapo ka mbërritur në Kubë, pas katër orësh udhëtimi me avion nga Meksika,
ku vizita e tij pati një jehonë të jashtëzakonshme, jo vetëm për turmat oqeanike,
që e shoqëruan, por edhe për pasqyrimin në media të fjalëve, që u drejtoi meksikanëve.
Nga heshtja e pabesueshme, që ra mbi Parkun e 200-vjetorit të pavarësisë në Leon,
gjatë homelisë së meshës, kuptohej qartë se njerëzit i dëgjonin me etje fjalët e Papës,
kishin nevojë për to. Fjalë kundër dhunës e vdekjes, kundër terrorizmit e drogës;
fjalë të dhembshura, që i tregonin popullit meksikan rrugën e daljes nga problemet,
duke e këshilluar ta mbajë të pastër zemrën, të imitojë Jezu Krishtin, sepse Ai çon
drejt përparimit e jo strategjitë njerëzore. Në ceremoninë e lamtumirës, në aeroportin
ndërkombëtar të Guanajuatos, Benedikti XVI u përsëriti me forcë meksikanëve ftesën
për t’i qëndruar besnikë fesë së tyre, që e gjen shprehjen e vet në dashurinë e jashtëzakonshme
për Zojën, e thirrur në Meksikë me emra kaq të bukur si Zoja e Guadalupes e Zoja e
Dritës. Meksika nuk duhet të ketë frikë nga forcat e së keqes, vazhdoi Ati i Shenjtë,
por të punojë që e tashmja dhe e ardhmja e saj të gjallërohen nga limfa e rrënjëve
të veta të krishtera: “Kam qenë dëshmitar i shqetësimeve për disa aspekte të
jetës së këtij vendi të dashur, disa të kohës së sotme e të tjera të së kaluarës,
por që vazhdojnë të shkaktojnë shumë probleme. Duke u bashkuar me vëllezërit e mi
meksikanë në gëzime e në hidhërime, i marr edhe këto me vete, për t’i paraqitur me
lutje në këmbët e Kryqit, para zemrës së Krishtit, nga ku rrjedhin uji e gjaku shpërblyes”. E
duke e përshëndetur Meksikën dhe popullin e saj mikpritës, Papa la porositë e fundit: “I
këshilloj me forcë katolikët meksikanë dhe të gjithë njerëzit vullnetmirë, të mos
i lëshojnë pe mendësisë utilitariste, që flijon gjithnjë më të dobtit e më të pambrojturit.
I ftoj në një përpjekje solidare, që t’i japë mundësi shoqërisë të përtërihet nga
themeli për një jetë të denjë, të drejtë e në paqe për të gjithë”. Për katolikët,
sqaroi Benedikti XVI, ky kontribut për të mirën e përbashkët është kërkesë e Ungjillit,
shprehja më e lartë e bamirësisë dhe e dashurisë së krishterë. Prandaj Kisha dëshiron
që besimtarët të jenë edhe qytetarë të mirë, të vetëdijshëm për përgjegjësitë që kanë
si në sferën personale, ashtu edhe në atë publike. Vizita e Atit të Shenjtë në Meksikë
përfundoi me një lamtumirë të veçantë: “Të dashur miq meksikanë, po ju them
lamtumirë, ashtu siç e thoni në shprehjen e bukur tradicionale hispanjolle: Mbetshi
me Tënzonë!”