Арцыбіскуп Бэчу: улады Кубы ўдзячныя за дзейнасць Касцёла
Субстытут Апостальскай
Сталіцы арцыбіскуп Анджэло Бэчу, які з 2009 па 2011 г. быў Апостальскім нунцыем на
Кубе, адзначыў, што дыпламатычныя адносіны паміж Святым Пасадам і гэтай краінай ніколі
не перапыняліся і існуюць ужо на працягу 75-ці гадоў. Ён падкрэсліў таксама, што асабліва
пасля візіта на Кубу бл. Яна Паўла ІІ адносіны паміж Касцёлам і ўладамі сталі больш
блізкімі і эфектыўнымі, у выніку чаго Касцёл здолеў атрымаць больш прасторы для сваёй
дзейнасці. “Можна сказаць, што Касцёл выйшаў з закрыстыі, дзе быў прымушаны знаходзіцца
і пачаў праводзіць вялікую катэхетычную дзейнасць”, - сказаў арцыбіскуп Бэчу. Ён падкрэсліў,
што Касцёлу была дадзена магчымасць для ажыццяўлення дабрачыннай дзейнасці і так ён
прыцягнуў многіх, нават тых, хто раней адыйшоў ад яго.
Арцыбіскуп Бэчу падкрэсліў
важную ролю Касцёла, і асабліва кардынала Артэгі, у вырашэнні шматлікіх сацыяльных
праблем краіны. Ён нагадаў, што пасля вялікага ўрагана, які абрушыўся на Кубу ў 2008
г. Касцёл актыўна шукаў дапамогі за мяжой, у міжнародных дабрачынных касцельных арганізацыях,
каб дапамагчы людзям, якія панеслі вялікія страты і гэта высока ацаніў ўрад. “Нават
калі Касцёл не мае сваіх школ, бальніц, устаноў, ён працягвае ісці шляхам асветленым
і ўмацаваным сілай Святога Духа, Евангелля і дабрачыннай дзейнасці. Гэта змяніла сэрцы
многіх людзей і яны пачалі захапляцца Касцёлам”, - сказаў былы нунцый на Кубе.