Hyjnia e Shpirtit Shenjt, në predikimin e tretë të Kreshmëve, në Vatikan.
Foli për hyjninë e Shpirtit Shenjt, sot paradite, atë Raniero Kantalamesa i cili,
në kapelën e Nënës së Shëlbuesit të Pallatit Apostolik, në Vatikan, mbajti predikimin
e tretë të Kreshmëve. Duke vijuar dy katekizmat e mëparshme, kushtuar mësimeve të
Etërve të Kishës Lindore, predikatari i Shtëpisë Papnore u bazua tek Shën Bazili,
për të vënë në pah, posaçërisht, përshkrimin e veprimit të Shpirtit Shenjt në historinë
e shëlbimit e në jetën e Kishës. “Shpirtrat e krijuar gjallojnë për vullnet të
Atit; përcillen nëpër jetë nga Biri e përsosen për virtyt të Shpirtit Shenjt”: kështu
e pati shpjeguar veprën e Trinisë Shenjte Bazili, ipeshkëv e dijetar i Kishës, që
jetoi në shekullin IV, duke u bërë shumë i njohur, posaçërisht për Traktatin kushtuar
Shpirtit Shenjt. Në të përshkroi veprimin e Vetjes së Tretë hyjnore, duke theksuar
ngjashmërinë me Atin e me Birin. Është Shpirti Shenjt, tha atë Kantalamesa, ai, që
e bën universin dhe çdo njeri të kalojë nga çrregulli, në rregull, nga pështjellimi,
në harmoni, nga shëmtimi, në bukuri, nga vjetërsia, në risi. Shpirti e rregullon,
e zbukuron, e rinon botën. Por kjo nuk duhet kuptuar sikur...: “Hyji Atë
të kishte krijuar një lëmsh kaotik, që kishte nevojë për korrigjimet e Shpirtit Shenjt.
Na e shpjegon përsëri Shën Bazili se ishte pikërisht plani i Atit ta krijonte botën
përmes Birit dhe ta çonte në përkryerje, përmes Shpirtit Shenjt”. E, duke
shpjeguar, më pas, praninë e Shpirtit Shenjt në veprën e Shpërblimit, ashtu si e përshkruan
Bazili, predikatari i Shtëpisë Papnore, shtoi: “Shpirti Shenjt është në veprim
që në parafoljet e profetëve e në përgatitjen e ardhjes së Shëlbuesit; përmes tij
realizohet mishërimi në kraharorin e Virgjërës Mari, sepse Zoja u zu pikërisht për
virtyt të Shpirtit Shenjt; është ai bagmi, me të cilin u lye Jezusi në pagëzim. Me
gishtin e Hyjit e me Shpirtin Shenjt Jezusi dëbon djajtë. Në përfundim, thotë Bazili,
Shpirti Shenjt ishte shok i pandarë i Jezusit gjatë gjithë jetës së Tij”.E
Shpirti Shenjt, shton përsëri Bazili, është i pranishëm edhe në Kishë e në jetën vetjake
të të krishterit: pastron shpirtrat nga mëkatet e i hap njeriut udhën e bashkimit
me Zotin. Shpirti Shenjt, përfundoi atë Kantalamesa, na risjell dritën. Është ai,
që e bën gjithnjë më të ndritshme figurën e Zotit, të cilën mëkati mundohet ta mjegullojë,
ta mbulojë, ta bëjë të padukshëm. Dhe e gjithë kjo, bëhet e mundur pikërisht për
virtyt të Shpirtit Shenjt.