Երէկ՝ երեքշաբթի 20 Մարտին, Գահիրէի մէջ տեղի ունեցաւ ղպտի եկեղեցւոյ գերագոյն հոգեւոր
պետ Շնոտա Գ. պապի յուղարկաւորութիւնը: Բազմահազար սգաւորներ մասնակցեցան 88-ամեայ պապին
յուղարկաւորութեան արարողութեան որ տեղի ունեցաւ Ս. Մարկոս Մայր տաճարին մէջ։ Եգիպտոսի
մէջ յուղարկաւորութեան մասնակցող ղպտիներուն արտօնութիւն տրուած էր իրենց աշխատատեղիներէն
բացակայելու եւ երկրին մէջ ազգային սուգ հռչակուած էր: 3 օգոստոս 1923-ի ծնունդ Շնոտա
Գ. պապը կը նկատուէր ղեկավար մը, որ իր կարելին ըրաւ պաշտպանելու ղպտիները այնպիսի ժամանակաշրջանի
մը մէջ, երբ իսլամականութիւնը վերելքի մէջ էր: Ան Եգիպտոսի նախագահ Անուար Սատաթի հետ
վէճէ մը ետք անապատին մէջ վանք մը աքսորուած էր: Սակայն անոր բուռն պահպանողականութիւնը,
ներառեալ` ապահարզանի գծով անոր ընդդիմութիւնը երիտասարդ քրիստոնեաներուն մօտ ժողովրդականութիւն
չէր վայելեր: Անոր յաջորդը ընտրելու ժամանակացոյց մը գոյութիւն չունի: Յաջորդ պապը
պիտի ընտրուի աւագ կրօնաւորներու ժողովին կողմէ: Նոր պապին առաջին մարտահրաւէրը երկրին
մէջ իրենց դերակատարութեան եւ տեղին նկատմամբ ղպտիներու մտավախութիւնները փարատելը պիտի
ըլլայ այնպիսի ժամանակաշրջանի մը մէջ, երբ Իսլամ եղբայրներն ու սալաֆականները երկրին
մեծագոյն կուսակցութիւններն են: Միացեալ Նահանգներու նախագահ Պարաք Օպամա Շնոտա Գ.
պապը «հանդուրժողականութեան եւ կրօնական երկխօսութեան ջատագով մը» կոչեց: Պենետիկտոս
ԺԶ. պապը եւ Ազհարի իմամ շէյխ Ահմետ Թայեպ եւս անոր մահուան համար ցաւ յայտնեցին: Միւս
կողմէ, Եգիպտոսի Ղպտի եկեղեցւոյ խորհրդական Նաժիպ Ժպրայել «Ախպար» օրաթերթին հետ հարցազրոյցի
մը ընթացքին յայտնեց, որ «մենք իսլամութիւնն ու իսլամները վարկաբեկողներուն դէմ կը կանգնինք`
մենք իբրեւ ղպտի իսլամներէն առաջ, եւ կը ջանանք զանոնք դատախազութեան յանձնել եւ արագ
ու արդար դատավարութեան ենթարկել: Ուստի կը պահանջենք անմիջապէս հարցաքննել այն սալաֆական
քարոզիչը, որ համարձակեցաւ մահուան սրբութիւնը ոտնակոխել եւ վախճանած պապին դէմ հայհոյեց»: