Апостальская Сталіца скончыла візітацыю Касцёла ў Ірландыі
Апостальская Сталіца
скончыла апостальскую візітацыю дыяцэзій, семінарыі і манаскіх кангрэгацый у Ірландыі.
Яна праводзілася ў адпаведнасці са спецыяльным паведамленнем ад 6 чэрвеня 2011 г.
з мэтай “падтрымаць мясцовы Касцёл на шляху аднаўлення” пасля выпадкаў сексуальных
злоўжыванняў некаторых святароў. У спецыяльным паведамленні аб выніках візітацыі адзначаецца,
што такім чынам Апостальская Сталіца яшчэ раз выказвае сваю блізасць да ахвяраў злачынстваў,
учыненых святарамі і законнікамі. “Візітацыя дала магчымасць ацаніць цяжкасць недахопаў,
якія паўплывалі на недастатковае разуменне і рэакцыю, у тым ліку з боку біскупаў і
кіраўнікоў манаскіх супольнасцяў, на жудасны феномен сексуальнага выкарыстання непаўналетніх”,
- гаворыцца ў дакуменце. Адзначаецца і відавочнасць таго факту, што “пачынаючы з 90-х
гадоў, былі зроблены рашучыя крокі наперад, якія прывялі да большага ўсведамлення
праблемы і глыбокіх перамен у спосабе іх пераадолення”.
Падкрэсліваецца, што
некаторыя прынятыя меры па барацьбе з падобнымі злачынствамі паказалі сваю эфектыўнасць.
Сярод іх: удзел вернікаў і касцёльных структур ў адукацыйнай працы і прэвентыўных
дзеяннях; супрацоўніцтва са свецкімі ўладамі; пастаяннае інфармаванне Кангрэгацыі
Веравучэння аб справах, якія належаць да яе кампетэнцыі.
Акрамя таго, у дакуменце
падагульняючым візітацыю адзначаецца, што вядзецца праца па вяртанні да выканання
пастырскай дзейнасці святароў, якія былі абвінавачаны фальшыва, а таксама ажыццяўленні
кантролю за святарамі і законнікамі, якія былі прызнаны вінаватымі ў злачынствах.
Падкрэсліваецца, што візітацыя семінарый дала магчымасць ацаніць працу, якая вядзецца
па адпаведнай падрыхтоўцы будучых святароў.