Vizitacioni apostolik në Irlandë: të përtërihet impenjimi kundër plagës së abuzimeve
Ipeshkvijtë dhe eprorët rregulltarë të Irlandës duhet të impenjohen vazhdimisht për
të çrrënjosur plagën e abuzimeve ndaj të vegjëlve: këtë nënvizon dokumenti vatikanas,
i publikuar sot, në përfundim të vizitacionit apostolik në Irlandë, gjatë të cilit,
të dërguarit e Papës vizituan dioqeza, institute rregulltarësh dhe seminare, për të
kontrolluar e këshilluar si të zbatohen parimet e Kishës në këtë fushë, përmendur
nga Benedikti XVI në Letrën e vitit 2010 për katolikët irlandezë. Në të, Ati i Shenjtë
shprehte shqetësimin e thellë, dhimbjen e turpin për abuzimet e disa anëtarëve të
klerit kundër fëmijëve dhe u siguronte lutje e afërsi viktimave të “këtyre akteve
mëkatare e kriminale”. Sinteza e rezultateve të vizitacionit apostolik është publikuar
në Vatikan e në Maynooth, afër Dublinit, ku u mbajt konferenca e shtypit e ipeshkvijve
irlandezë. Në dokument vihet në dukje mungesa e reagimit nga ana e disa ipeshkvijve
dhe eprorëve rregulltarë para fenomenit të abuzimeve, njihen hapat e bëra në favor
të viktimave që nga vitet ’90 dhe njoftohet se Kisha irlandeze, në bashkëpunim me
Selinë e Shenjtë, po reflekton mbi përshtatjen e strukturave dioqezane për t’iu përgjigjur
misionit të katolikëve në vend. Më pas, përmenden Direktivat për mbrojtjen e të
miturve të vitit 2008, duke theksuar bashkëpunimin me autoritetet civile, parashikuar
prej tyre, e nevojën për t’ia paraqitur Kongregatës për Doktrinën e Fesë, gjithçka
është në kompetencën e saj. Dokumenti i nxit ipeshkvijtë të miratojnë normativën e
nevojshme për trajtimin e rasteve të meshtarëve e të rregulltarëve të akuzuar për
abuzime, edhe kur prokurori civil vendos të mos i hedhë në gjyq. Gjithashtu, rregulla
të caktuara duhet të parashikojnë kthimin në shërbim të meshtarëve të akuzuar pa të
drejtë. Duke kërkuar forcimin e përgjegjësisë së ipeshkvijve në administrimin e
seminareve, në dokument nënvizohet nevoja e kritereve më të rrepta për pranimin e
seminaristëve, domosdoshmëria që ata të qëndrojnë në ndërtesa të veçanta dhe të marrin
formimin e duhur në lëndën e mbrojtjes së të miturve. Parimet kryesore, që duhet të
udhëheqin përtëritjen e Kishës në Irlandë mbeten: formimi në fe, vlerësimi i impenjimit
të laikëve, roli i mësuesve të fesë, kontributi i lëvizjeve dhe besnikëria ndaj Magjisterit.