Папа выказаў спачуванні ў сувязі са смерцю Патрыярха Александрыйскага Шэнуды ІІІ
19 сакавіка Бэнэдыкт
XVI скіраваў спачувальную тэлеграму ў сувязі са смерцю Патрыярха Александрыйскага
Шэнуды ІІІ, які памёр 17 сакавіка. Папа выказаў свае “самыя шчырая братэрскія спачуванні”
членам Святога Сінода, а таксама святарам і вернікам Копцскай Праваслаўнай Царквы.
“Я з удзячнасцю ўспамінаю аб яго імкненні да хрысціянскага адзінства, яго сустрэчу
з маім папярэднікам Паўлам VI і падпісанне 10 мая 1973 г. у Рыме сумеснай Дэкларацыі
аб уцелаўленні Сына Божага. Я таксама памятаю яго сустрэчу з бл. Янам Паўлам ІІ, якая
адбылася 24 лютага 2000 г. у Каіры, падчас Вялікага Юбілею”, - напісаў Бэнэдыкт XVI.
Святы Айцец падкрэсліў, што Каталіцкі Касцёл падзяляе смутак праваслаўных коптаў і
ў гарачай малітве просіць Таго, хто з’яўляецца ўваскрасеннем і жыццём, сустрэць Яго
вернага слугу. “Няхай Бог у сваёй міласэрнасці дасць яму радасць, мір і святло”,
- пажадаў Папа.
Патрыярх Александрыйскі Шэнуда ІІІ з’яўляўся кіраўніком Копцскай
Праваслаўнай Царквы з 1971 г. За гэты перыяд яна дасягнула значнага развіцця. Шэнуда
ІІІ быў шчырам прыхільнікам хрысціянскага адзінства. За апошнія 1500 гадоў ён першы
спасярод лідэраў праваслаўных коптаў сустрэўся з Рымскім Пантыфікам. Гэта адбылося
ў 1973 г. падчас пантыфіката Паўла VI.