Kardinali Skola në Gniezno: kriza ekonomike duhet parë në këndvështrimin etik
Si të jemi të krishterë të mirë në periudhën aktuale të krizës ekonomiko-financiare:
kjo është tema mbizotëruese në Asamblenë IX të Gnieznos në Poloni, e cila po
reflekton mbi shoqërinë civile evropiane dhe mbi rolin, që mund të luajnë të krishterët
në të. Në këtë takim, morën pjesë edhe kryetari i Këshillit Papnor për Laikët,
kardinali Stanislau Rilko, kreu i ipeshkvijve gjermanë, imzot Robert Xollitsh dhe
kardinali Anxhelo Skola, kryeipeshkëv i Milanos. Në fjalën e tij, ky i fundit, analizoi
epokën moderne aktuale, duke i ftuar të gjithë të ndërgjegjësohen për përgjegjësitë
e secilit për të mirën e përbashkët, edhe me çmimin e sakrificave e të impenjimeve
të rënda. Nuk kemi të bëjmë thjesht me krizë ekonomike, theksoi prelati, duhet
rikrijuar besimi tek njëri-tjetri. Nga mënyra se si çdo njeri krijon marrëdhënie me
të tjerët, mund të kuptohet ideja e asaj shoqërie për familjen, fqinjësinë, qytetin,
vendin, Evropën e njerëzimin mbarë. Prandaj, sipas kardinalit të Milanos, duhet refuzuar
mendësia, që e shikon shkëmbimin ekonomik si parësor në shoqëri, duke e shndërruar
njeriun në “homo oeconomicus”. Së dyti, u duhet kushtuar vëmendje e duhen luftuar
të gjithë faktorët, që çojnë drejt afirmimit të mendësisë pozitiviste e, së fundi,
duhet pranuar se kriza e ka bazën edhe tek papërgjegjshmëria e vetë njerëzve, sidomos
të atyre që i shtrijnë këmbët më shumë se jorgani, duke shpenzuar edhe atë që akoma
nuk e kanë fituar.