Бэнэдыкт XVI перад “Анёл Панскі”: рэгулярна прыступаць да сакрамэнту споведзі (поўны
тэкст)
Бэнэдыкт XVI заклікаў
вернікаў рэгулярна прыступаць да сакрамэнту споведзі, каб атрымаць прабачэнне Пана
і зрабіць шлях да навяртання больш інтэнсіўным. З такім заклікам Пантыфік звярнуўся
да вернікаў сабраных на плошчы св. Пятра ў Рыме 18 сакавіка перад традыцыйнай нядзельнай
малітвай “Анёл Панскі”. “Дарагія браты і сёстры, – сказаў Папа – На нашым шляху да
Пасхі, мы дасягнулі чацьвертай нядзелі Вялікага посту. Ён з’яўляецца шляхам з Езусам
праз “пустыню”, г.зн. часам на больш уважлівае слуханне голаса Бога і распазнання
спакусаў, якія прамаўляюць унутры нас. На даляглядзе гэтай пустыні бачны крыж. Езус
ведаў, што крыж з’ўляецца кульмінацыяй яго місіі: сапраўды, крыж Хрыста – гэта вяршыня
любові, якая дае збаўленне. Аб гэтым кажа Ён сам у сённяшнім Евангеллі: “Як Майсей
узняў змея ў пустыні, так павінен быць узняты Сын Чалавечы, каб кожны, хто верыць
у Яго меў жыццё вечнае” (Ян 3,14-15). Тут ёсць спасылка на эпізод у якім, падчас выхаду
з Егіпта, габрэі былі атакаваны атрутнымі змеямі і многія з іх памерлі; тады Бог загадаў
Майсею зрабіць змея з медзі і павесіць яго на жэрдзі; калі ўкушаны глядзеў на яго
– заставаўся жывы (пар. Ліч 21,4-9). Таксама Езус быў узвышаны на крыжы, каб кожны,
хто станавіўся перад абліччам смерці з прычыны граху, мог звярнуцца да Яго, які памёр
за нас, і быць збаўленым. Бо, як піша св. Ян “Не паслаў Бог Сына свайго ў свет, каб
судзіць свет, але каб свет быў збаўлены праз Яго” (Ян 3, 17).
Св. Аўгустын
так каментаваў гэты фрагмент: “Медык, згодна са сваімі абавязкамі, павінен лячыць
хворых. Калі нехта не звяртаецца да медыка, то знішчае сябе сам. Збаўца прыйшоў у
свет ... Калі ты не хочаш быць збаўленым Ім, то сам асуджаеш сябе” (Sul Vangelo di
Giovanni, 12,12: PL 35, 1190). Такім чынам, калі бясконцай з’яўляецца міласэрнасць
Бога, які даў свайго адзінага Сына дзеля адкуплення нашага жыцця, вялікай таксама
з’яўляецца наша адказнасць: кожны, павінен прызнаць сябе хворым, каб аздаравіцца;
кожны павінен паспавядацца з уласных грахоў, каб Божае прабачэнне, падараванае праз
крыж, магло мець эфект у жыцці і сэрцы. Піша св. Аўгустын: “Бог асуджае твае грахі;
і калі і ты іх асудзіш, то паяднаешся з Богам ... Калі табе стане непадабацца тое,
што ты ўчыніў, тады пачнуцца твае добрыя ўчынкі, бо асуджаеш тое ліхое, што ўчыніў”
(Там жа, 13: PL 35, 1191). Часам чалавек любіць цемру больш чым святло, бо яго атакуюць
яго грахі. Але толькі праз адкрыццё на святло, і толькі праз шчырую споведзь у грахах
перад Богам, можна знайсці сапраўды супакой і сапраўдную радасць. Важна рэгулярна
прыступаць да сакрамэнту споведзі, асабліва падчас Вялікага Посту, каб атрымаць прабачэнне
Пана і зрабіць наш шлях да навяртання больш інтэнсіўным.
Дарагія сябры, заўтра
мы будзем святкаваць успамін св. Юзэфа. Ад усяго сэрца дзякую тым, хто ўзгадае аба
мне ў малітве, у дзень майго апекуна. Асабліва, прашу маліцца ў інтэнцыі майго Апостальскага
падарожжа ў Мексіку і на Кубу, якое пачнецца ў наступную пятніцу. Даверым яго заступніцтву
Найсвяцейшай Панны Марыі, якую вельмі любяць і шануюць у гэтых двух краінах, якія
я ўжо гатовы наведаць”.
Пасля малітвы “Анёл Панскі” Папа нагадаў, аб VI Сусветным
водным форуме, які ўчора закончыўся ў французскім Марсэле і падкрэсліў, што ў наступны
чацвер будзе адзначацца Сусветны дзень вады. “Жадаю, каб гэтыя ініцыятывы садзейнічалі
гарантаванню для ўсіх свабоднага, надзейнага і адпаведнага доступа да вады, спрыяючы
такім чынам праву кожнага чалавека на жыццё і харчаванне, а таксама адказнаму выкарыстанню
зямных дабротаў, дзеля дабра цяперашніх і будучых пакаленняў”, - заклікаў Святы Айцец.