Հռոմի Ճեմելլի Վիրաբուժական Համալսարանը Եւ Բազմաբուժարանը Կը Տօնէ Իր Հիմնարկութեան
50ամեակը։
Սրբազան Հայրը 3 մայիսին կ'այցելէ քահանայապետներու հիւանդանոցը։ Ս. Աթոռի մամլոյ
գրասենեակը կը տեղեկագրէ որ յառաջիկայ 3 մայիսին Պենետիկտոս ԺԶ Քահանայապետը այցելութիւն
կը կատարէ Ճեմելլի բազմաբուժարանը, անոր հիմնարկութեան 50-ամեակին առթիւ եւ տեղւոյն վրայ
ճառ մը պիտի արտասանէ։ Ճեմելլի կաթողիկէ համալիրը կը ներփակէ համալսարանական բժշկական
մասնաճիւղ մը եւ բազմաբուժարան մը։ Իր քահանայապետութեան այս տարիներուն Նորին Սրբութիւնը
չորս անգամ այցելած է Ճեմելլին։ Առաջին ամիսներուն (իր քահանայապետութեան) 5 օգոստոս
2005-ին, այցելութիւն կատարած էր իր քահանայ եղբօր որ հիւանդանոցն էր։ Նոյն տարին Նորին
Սրբութիւնը բացումը կատարած էր կաթողիկէ համալսարանի ակատեմական տարւոյն։ 9 յունուար
2010-ին Սրբազան Քահանայապետը դարձեալ հիւանդանոցը գացած էր այցելելու կարտինալ Էչիկարային,
որուն ոտքը կոտրուած էր ճրագալոյսի պատարագին ընթացքին։ Իսկ 5 յունուար 2011-ին Նորին
Սրբութիւնը նոյն հիւանդանոցին մէջ այցելած էր մանուկներու բաժինը։ Նշենք որ Ճեմելլի հիւանդանոցը
աշխարհառչակ դարձած էր յաճախ ընդունելով ու խնամելով երջանկայիշատակ Յովհաննէս Պօղոս
Բ Քահանայապետը։ Ներկայիս 82 տարեկան կարտինալ Ինքնատիոս Տաուտը՝ Ճեմելլի հիւանդանոցը
կը գտնուի բուժուելու համար։ Ան եղած է ասորի կաթողիկէներու պատրիարքը եւ կառավարիչը
արեւելեան եկեղեցիներուն։