Մեծ Պահքի շրջանը այս տարի սկսաւ Փետրուար 20ին: Անիկա կը տեւէ 48 օր` Բուն Բարեկենդանէն
մինչեւ Ս. Յարութեան (Զատիկի) տօնի նախօրէն: Այս տարի Ս. Յարութեան տօնը կը նշուի Ապրիլ
8ին: Պահքի 40 օրը կը խորհրդանշէ անապատի մէջ Քրիստոսի քառասունօրեայ աղօթքի, ծոմապահութեան
եւ ապաշխարութեան շրջանը: Իր մկրտութենէն ետք Յիսուս «Հոգիով անապատ առաջնորդուեցաւ ու
քառասուն օր փորձութեան ենթարկուեցաւ սատանայի կողմէ։ Այդ օրերուն չկերաւ ու չխմեց: Յիսուս
Ինքզինք ծոմապահութեան ենթարկեց մարդկային ցեղի փրկութեան համար, մարդկութեան փոխարէն
Ինք ապաշխարեցաւ, որպէսզի բոլոր պահք պահողներու ապաշխարանքը իմաստ եւ իրականութիւն ստանան՝
շնորհիւ Իր ծոմապահութեան: Քառասնօրեայ պահքին կը յաջորդէ պահոց եւս մէկշաբաթեայ շրջան`
աւագ շաբաթը: Այդ է պատճառը, որ քառասնօրեայ կոչուող պահքը 48 օր կը տեւէ: Մեծ Պահքը
ունի եօթ Կիրակի, եօթ յիշարժան օրեր. բուն բարեկենդան, Արտաքսում, Անառակի, Տնտեսի, Դատաւորի,
Գալստեան եւ Ծաղկազարդ: Մեծ Պահքն այս տարի կը կիսուի Մարտ 14ին եւ կը կոչուի միջինք:
Ժողովրդական սովորութեան համաձայն` այդ օրր կը պատրաստեն բաղարջէ պահոց գաթայ, որուն
մէջ մետաղադրամ կը դնեն: Սովորութեան համաձայն` բաժին հասնող մետաղադրամը յաջողութիւն
կը բերէ: Մեծ Պահքի շրջանին վաղնջական կանոններով արգիլուած եղած են պսակադրութիւնները
եւ մատաղը: Սակայն Վազգէն Ա. կաթողիկոսի շրջաբերականով՝ խիստ անհրաժեշտութեան պարագային
թոյլատրուեցաւ պսակադրութիւն կատարել Մեծ Պահքի Շաբաթ եւ Կիրակի օրերին, բացառապէս Աւագ
շաբաթուան բոլոր օրերէն: Բանաստեղծուհի- հաղորդավար Սոնիա Թաշճեան կ’ըսէ,- «Ըստ Հայկական
աւանդութեան, պահքի առաջին օրը տան մեծ մայրիկը կը պատրաստէր «ակլատիզ» կոչուող տղամարդ-պուպրիկը,
որը ամրացուած կ’ըլլար սոխի մը վրայ, ուր կը խրէին նաեւ 7 փետուրներ, 3ը սեւ` ձմրան շաբաթները
խորհրդանշող, 3ը ճերմակ` գարնան ամիսները խորհրդանշող եւ մէկն ալ մոխրագույն կամ խառն
սեւ-ճերմակ` իբրեւ խորհրդանիշ ձմեռէն գարուն անցումային շաբթուան, որ հաստատապէս կը վերաբերի
միջինքի շաբթուան: «Գարնան անցման օրերուն յատուկ է նաեւ ծիսական այլ սովորութիւն
մը, երբ տանտիկինը ձեռքին վերցնելով անձեռոց մը, դուռ-պատուհան կը բանայ եւ անձեռոցը
շարժելով կը վռնտէ կարծեցեալ ձմեռնային ոգիները եւ կը դիմաւորէ գարունը, ըսելով,- «Շվոտ`
դուրս, Մարտ` ներս»: Շվոտը (շվատ, շուպաթ արաբերէնի մէջ տարուան երկրորդ ամսուան անունն
է) այսինքն՝ Փետրուար: «Հետեւաբար, միջինքը նաեւ բնութեան զարթօնքի եւ գարնանային
տօն է: Վանի մէջ, երիտասարդները կ’երթային իրենց արտը ողջունելու եւ գարունը աւետելու,
ըսելով,- «Աշխարհին լոյս տալու եկողը` թող քեզ ալ լիութիւն տայ»: Կարգ մը հայկական գիւղերու
մէջ, Միջինքի օրը սովորութիւն կար ընտանիքներով եւ խնամիներով դաշտագնացութեան երթալու:
Բնականաբար դաշտերէն կը հաւաքէին թարմ կանաչիներ եւ կը պատրաստէին կուտապներ, ապուր եւ
փիլաւ. տեղի կ’ունենար կերուխում, երգ ու պար: Նշանուած աղջիկները իրենց կեսուրէն կը
ստանային նուէրներ եւ քաղցրեղէններ: Տարածուած էր նաեւ հարսնցուն տուն տանելու, ինչպէս
նաեւ խաշած հատիկեղէնով մեծ ափսէ մը զարդարելու սովորութիւնը, որ գարնանացանի եւ երկրագործական
տարուան բարեբերութեան աղերսն է: Պատահական չէ նաեւ միջինքի օրուան յատուկ ճաշատեսակներու
ընտրութիւնը, օրինակ` Նոր Ջուղայեցիներու թթուեպասը, որ հատիկեղէնով ապուր է. յայտնի
թոփիկը, որ կը պատրաստուի սիսեռով. Տիգրանակերտցիներու թթապուրն ու թփուկ կոլոլակը, եւ
այլն...: «Միջինքին ընդունուած էր թխել նաեւ տարբեր տեսակի բաղարջներ եւ հացեր, որոնք
մեծ մասամբ կը բաժնուէին: Սովորութիւն կար նաեւ պատրաստելու միջինքով ծիսական - գուշակութեան
հացեր, այսինքն` մէջը պայմանական նշան դրուած հաց»: