Святы Айцец пазнаёміўся са статыстычнымі дадзенымі аб Касцёле
10 сакавіка кардынал
Дзяржсакратар Тарчызіо Бэртонэ і арцыбіскуп Анджэло Бэчу, субстытут Апостальскай Сталіцы,
прадставілі Бэнэдыкту XVI “Папскі даведнік на 2012 г.” Пантыфік падзякаваў за працу,
якая была зроблена для яго складання і праявіў вялікую цікавасць да статыстычных дадзеных
аб Касцёле, якія ў ім прадстаўлены. У даведніку адзначаецца, што на працягу 2011 г.
Папай былі створаны 8 новых біскупскіх кафедр, 1 асабісты ардынарыят і 1 вайсковы.
Акрамя таго, узніклі 1 архідыяцэзія, 8 мітраполій, 1 прэлатура, 1 Апостальскі вікарыят,
1 Апостальская прэфектура і 1 місія “sui iuris”. Статыстычныя дадзеныя прадстаўленыя
ў даведніку сведчаць аб тым, што колькасць католікаў у свеце працягвае расці. Напрыклад,
з 2009 г. іх колькасць узрасла на 15 млн. (1,3%) і сёння складае 1, 196 млн. Аднак
трэба заўважыць, што гэты рост з’яўляецца нераўнамерным. Колькасць католікаў незначна
паменшылася ў Цэнтральнай Амерыцы і ў Еўропе, аднак узрасла ў Афрыцы і паўднёва-усходняй
Азіі.
Узрасла ў свеце колькасць біскупаў. Сёння іх налічваецца 5 104. Таксама
ўзрасла колькасць святароў. Іх колькасць у свеце раўна амаль 411 тыс. Яна павялічвалася
ва ўсіх частках свету акрамя Еўропы.