Papa kërkon të njihet roli i grave në zhvillimin e shoqërisë
“Të lutemi, që të njihet në mbarë botën kontributi i grave për zhvillimin e shoqërisë.
Ky është ndjeti i lutjes së përgjithshme të Benediktit XVI për muajin mars. Të mos
harrojmë se gjatë 31 ditëve të marsit, njëra, data 8, i kushtohet pikërisht këtij
kontributi të pashoq të gruas, duke e parë veprimtarinë e saj në të gjitha fushat
e jetës, që nga djepi, tek streha e tek sofra e shtruar ditë për ditë për të mbledhur
rreth saj familjen. E Papa nënvizon me forcë kontributin e gjenisë femërore në jetën
e Kishës e të shoqërisë. Për këtë ndjet papnor të lutjes, të dëgjojmë Kiara Amiranten,
themeluese e Lëvizje “Horizonte të reja”:
Përgjigje: - Mendoj
se është një meritë e madhe e Atit të Shenjtë që, përmes ndjetit të lutjes, tërheq
vëmendjen pikërisht tek dinjiteti i gruas, sepse në kohët tona, do të thosha se roli
i gruas në shoqëri jo vetëm që shikohet me sy nënvleftësues, por edhe diçka më shumë.
Duhet rikthyer vlerësimi i gjenisë femërore, që e pati theksuar aq me forcë Gjon Pali
II, duhet rizbuluar, deri në thellësitë e veta të pamatura. E kjo, sepse më duket
se sot kemi kaluar në garën e gruas për t’ia zënë vendin burrit e anasjelltas. Po
gruaja është grua e burri, burrë. Prandaj duhet rizbuluar sesa burri, me karakteristikat
e veta, mund të jetë dhuratë dashurie për gruan, e anasjelltas. E unë mendoj se bota
sot ka nevojë më shumë se për çdo gjë tjetër, pikërisht për pakëz dashuri.
Pyetje:
- Ç’kontribut të veçantë mund të japë gruaja e krishterë në shoqërinë e kohës
sonë?
Përgjigje: - Çka e karakterizon gruan, është pikërisht
aftësia e veçantë, vëmendja e veçantë për më të fundmit, prirja për solidaritet, aftësia
për mikpritje. Ndërsa situata e sotme e gruas është me të vërtetë dramatike, pa folur
këtu, për tregun e seksit e pornografinë. Mjafton të sjellësh në mendje vetëm disa
të dhëna statistike, për t’u tmerruar. E kjo, sepse flasim për 320 milionë djem e
vajza të shpërdoruara seksualisht. E të dhëna të tilla nuk mund të shikohen me indiferencë.
Na kujtojnë se gruas i duhet dhënë vendi i drejtë, se duhet të rigjejë dinjitetin
e humbur, se nuk duhet shikuar, siç shikohet tepër shpesh, vetëm si objekt i kënaqësisë
e i shfrimit seksual.
Pyetje: - Dashuria është mister, e ju na e
kujtoni këtë në librin tuaj të fundit: gruaja për vetë natyrën e saj e jeton thellësisht
këtë mister dashurie…. Përgjigje: - Gruaja, në këtë drejtim, na
ndihmon sadopak të kujtojmë se dashuria zë kryet e vendit në jetën e familjes, në
jetën e shoqërisë e të Kishës Kemi një model në kuptimim e mirëfilltë të kësaj fjale:
Marinë, e cila jo vetëm e pranoi misterin e dashurisë së Hyjit, i cili na deshi aq
shumë, e vijon të na dojë pa kufi, por diti edhe ta jetojë në mënyrë të përkryer këtë
dashuri, më e madhja, që provoi ndonjëherë njeriu. E ky njeri, ishte një Grua!