Апостальская Сталіца звяртае ўвагу на праблемы жанчын, якія жывуць у сельскай мясцовасці
6 сакавіка арцыбіскуп
Фрэнсіс Чулікат, пастаянны назіральнік Апостальскай Сталіцы пры ААН, скіраваў зварот
да 56-й сесіі Камісіі ААН па праблемах жанчын. Арцыбіскуп звярнуў увагу на складаную
сітуацыю жанчын, якія жывуць у сельскай мясцовасці, і адзначыў, што яны складаюць
большую частку насельніцтва планеты. Гаворачы аб праблемах гэтай катэгорыі жанчын,
асабліва ў бедных краінах, іерарх адзначыў, што яны часта падвяргаюцца прыніжэнням,
працуюць у складаных умовах і атрымліваюць неадэкватную аплату, пазбаўленыя доступу
да добрага харчавання і вады, не абароненыя ад гвалту. Арцыбіскуп Чулікат падкрэсліў,
што ў такіх умовах жанчына не можа клапаціцца аб сабе, сваіх дзецях і сям'і і гэта
спрыяе з'яўленню новых сацыяльных праблем. Іерарх заклікаў спрыяць палітыцы абароны
жанчын, якія жывуць у сельскай мясцовасці, праз пашырэнне доступу да адукацыі, паслуг,
фінансавых і камунікацыйных тэхналогій.