Benedikti XVI në famullinë romake në Torrino: feja duhet njohur
“Të zhduket analfabetizmi fetar, një nga problemet më të vështira të kohës
sonë”: kjo ishte porosia kryesore e Papës sot, gjatë Meshës, kremtuar në famullinë
e Shën Gjonit Batista dela Sale, në lagjen romake, në Torrino. Feja duhet jetuar së
bashku, e famullia është vendi, ku njeriu ndjehet në mjedisin e vet, në Kishë, tha
Papa, duke kujtuar, në vijim, edhe detyrën e familjes për edukimin fetar të fëmijëve.
E, kur e rrethoi një turmë gazmore fëmijësh, Ati i Shenjtë nuk mundi të mos entuziazmohej
e, sidomos, të mos mbushej me optimizëm për të ardhmen: “Ç’gëzim i madh të shikosh
kaq shumë fëmijë, theksoi! Roma jeton e do të jetojë edhe nesër”.
Pritje e ngrohtë,
e përzemërt e plot dashuri, ajo që i bënë Papës banorët e lagjes Torrino, në rrethinat
e Romës. Gjatë homelisë, Benedikti XVI komentoi leximet, duke u nisur nga prova e
rëndë e Abrahamit, kur Zoti i kërkoi të flijonte të birin e vetëm, Isakun. Mund ta
marrim me mend, shpjegoi Papa, atë që provoi zemra e atit, e, jo më pak, edhe zemra
e birit. Por gjithçka, që nisi me hijen e rëndë të vdekjes, përfundoi me gazin e jetës.
Sepse Zoti nuk e do vdekjen, do jetën: “Abrahami lëshohet aq plotësisht
në dorë të Zotit, sa është gati të flijojë edhe të birin, e me të birin, ardhmërinë,
sepse pa të birin, Toka e premtuar bëhej hi e pluhur. E, duke flijuar të birin, flijonte
edhe vetveten, gjithë të ardhmen e tij, gjithë premtimin. Jemi vërtet para një besimi
pa asnjë kusht”. Në leximin e dytë, Benedikti XVI kaloi në një episod tjetër,
atë të Shndërrimit të Zotit. Pjetrit, Jakut e Gjonit Jezusi i tregon udhën e dashurisë
së ndritshme, që fiton mbi errësirën, udhën, që kalon përmes dhurimit të plotë të
vetvetes. Është udha e shkandullit të Kryqit. Ndërsa Shndërrimi, çast i përshpejtimit
të dritës, e… “…hekzod përfundimtar, që na hap portën kah liria e risia e
Ringjalljes, kah shpëtimi nga e keqja. Sa nevojë kemi për të, në udhën tonë të përditshme
, mbi të cilën shpesh dyndet errësira e së keqes”. Ne, ashtu si Apostujt,
vijoi Ati i Shenjtë, kemi shumë nevojë të shndritemi nga drita e Zotit. E Zotin mund
ta takojmë përmes lutjes në bashkësi e në vetmi. Jo si ide, as si propozim moral,
por si Vetje: “Mos prisni që të tjerët të vijnë e të na sjellin mesazhe
të ndryshme, që nuk çojnë në jetën e vërtetë, por bëjuni ju vetë misionarë të Krishtit
për vëllezërit, atje ku jetojnë, ku punojnë, studiojnë ose kalojnë kohën e lirë”. Vendi
i vërtetë ku jetohet feja, është famullia, ku jemi “neve”, ne, të Kishës e të familjes
së Zotit: “Uroj që Viti i Fesë të jetë rast i përshatshëm edhe për këtë famulli,
për t’u rritur, për të përforcuar përvojën e katekizmit mbi të vërtetat e mëdha të
fesë së krishterë e për të krijuar, kështu, kushtet, që e gjithë lagjeja ta njohë
e ta thellojë Besojmën e Kishës, duke zhdukur atë analfabetizëm fetar, që është një
nga problemet më të mëdha të kohës sonë”. E mjedisi kryesor i jetës, është
familja, kujtoi Papa, sepse pikërisht në familje hidhen hapat e para të fesë. Është
e nevojshme edhe që Eukaristia të shikohet si zemra e jetës. Të bashkuar rreth saj,
e kuptojmë më lehtë se misioni i çdo bashkësie të krishterë është t’ia kumtojë njerëzve
mesazhin e madh të dashurisë së Zotit për të gjithë njerëzit.
Sapo arriti në
famullinë al Torrino, kushtuar në dhjetor 2009, Papa u prit nga një turmë gazmore
fëmijësh, që nuk u larguan, pa e përshëndetur nga afër: “Për mua është gëzim
i madh të shikoj kaq shumë fëmijë. Atëherë Roma jeton, e do të jetojë edhe nesër!
Ju jeni udha e katekizmit: mësoni nga Jezusi, mësoni ç’bëri Zoti, çfarë tha, sa vuajti;
do të mësoni, kështu edhe Kishën, sakramentet e kështu do të mësoni edhe të jetoni,
sepse të jetosh është art më vete. E kush mund të na e mësojë këtë art, më mirë se
Jezusi?”. Pas takimit me fëmijët, Papën e përshëndeti famullitari i famullisë
së Shën Gjonit Batista dela Sale, dom Gjanpaolo Perugjini, duke theksuar: “Ne
ju presim si Bari i Kishës universale, por sidomos, si Ipeshkvi ynë i Romës. Ju presim
si Papë, por më shumë si Babë! Papës i bëhen gjithnjë dhuratat më të çmuara, ndërsa
babës nganjëherë nuk dijmë ç’ t’i dhurojmë… aq më tepër ju, që nuk mbani as kravatë!”. Në
përfundim, duke përshëndetur besimtarët në tremen e famullisë, Papa kujtoi se jemi
një familje me të gjithë Shenjtorët e se është e nevojshme të kujtojmë çdo ditë se
Zoti është pranë nesh, sepse është qendra e jetës sonë.