Кс. Ламбардзі: чым больш словаў, тым больш павінна быць маўчання
Кіраўнік Залі Друку
Апостальскай Сталіцы і Дырэктар Ватыканскага радыё кс. Фэдэрыко Ламбардзі адзначыў,
што папа Бэнэдыкт ХVI першы тыдзень Вялікага посту традыцыйна прысвяціў, духоўным
практыкаванням, у якіх прынялі ўдзел шматлікія супрацоўнікі Рымскай Курыі. Кс. Ламбардзі
звярнуў увагу на тое, што падчас гэтага тыдня Святы Айцец не меў ніякіх сустрэч з
вернікамі і не прамаўляў да іх, а толькі засяродзіўся на маўчанні і на малітве. “Веруючы
чалавек імкнецца кожны дзень прысвячаць час на маўчанне і малітву, але велікапостная
паўза ставіць перад намі большыя патрабаванні і становіцца больш яскравым знакам і
заклікам”, - адзначыў святар.
“У пасланні на Сусветны дзень сацыяльнай камунікацыі
на тэму “Маўчанне і Слова”, Святы Айцец падкрэсліў, што маўчанне дае больш магчымасцяў
для слухання іншых і асабліва Бога. Калі мы маем доступ да змястоўных паведамленняў
і інфармацый, тады маўчанне становіцца неабходным для таго, каб адрозніць тое, што
важнае, ад таго, што бескарыснае ці павярхоўнае”, - нагадаў словы Папы кс. Ламбардзі.
Святар
перасцярог перад рызыкай таго, што шмат інфармацыі, да якой мы маем доступ і якой
усё больш з’яўляецца на рынку, можа стаць небяспечнай і перад чалавекам узнікае пагроза
быць яе нявольнікам. Дырэктар Ватыканскага радыё адзначыў, што сёння людзі амаль не
правяраюць інфармацыю і прымаюць як апантаныя яе неабмежаваную колькасць. “Больш карыснымі
з’яўляюцца хвіліны сапраўднага маўчання, падчас якіх мы можам пачуць больш глыбокія
пасланні, ідэнтыфікаваць іх сярод іншых і пачаць “наводзіць парадак у сваім жыцці”
застаючыся сярод патоку слоў, якія сёння маюць прыцягальнае і драматычнае вымярэнне”,
- падкрэсліў кс. Ламбардзі. “Як у такіх умовах можна памятаць, напрыклад, што Езус
памёр і ўваскрос дзеля нас, стаўшы святлом на нашым шляху?”, - запытаўся кс. Ламбардзі.