Նոր Աւետարանացումը Եւ Քրիտոնեական Հաւատքի Փոխանցումը Եկեղեցին՝
Աստուածային կառույց
Եկեղեցին՝ յունարէն Ἐκκλησία (ekklesia), բառէն եկած է, որ կը նշանակէ համախմբում, կազմակերպութիւն,
ժողովարան կամ հաւաքատեղի: Մեր Տէրը Յիսուս, աշխարհէն չմեկնած ուզեց հիմնել կազմակերպութիւն
մը, որուն նպատակը ըլլար անոր փրկչագործութեան առաքելութիւնը շարունակել բոլոր ազգերուն
ու ժողովուրդներուն համար: Աստուածային այս նպատակը իրագործելու համար, Յիսուս աշակերտներ
ընտրեց եւ զանոնք առաքեալներ կարգեց, որոնց հաւատացող մարդոց ամբողջութիւնը ,Եկեղեցիե
կոչուեցաւ, որ հաւաքոյթ կը նշանակէ ինչպէս ըսինք: Հետեւաբար, Եկեղեցին Քրիստոսի հիմնած
հոգեւոր այն կազմակերպութիւնն է, որուն առաքելութիւնը կը կայանայ մարդիկը քրսիտոնեայ
դարձնելու եւ զանոնք առաջնորդելու դէպի երկնաւոր արքայութիւնը, դէպի յաւիտենական կեանքը:
Եկեղեցին, իր էութեան մէջ կը կազմէ մարմին մը, որուն անդամ կը դառնան բոլոր ժողովուրդներուն
պատկանող մկրտուած այն հաւատացեալները, որոնք Յիսուս Քրիստոսը կը դաւանին որպէս Աստուած,
եւ անոր քարոզած վարդապետութիւնը կը ճանչնան: Որպէս կազմակերպութիւն, Եկեղեցին ունի
ընկերային- հասարական կառոյց, տնտեսութիւն, վարչակազմ: Եկեղեցին ունի հրամանի կեդրոն
եւ գլուխ՝ նշանակուած իր հիմնադրին կողմէ, Քրիստոսէն, որպէս յաջորդ Ս. Պետրոս առաքելապետի,
եւ այս գլխապետին կը հնազանդին Եկեղեցիին պատկանող ամէնազգի եկեղեցականներն ու աշխարհական
հաւատացեալները: Քրիստոսի հիմնած Եկեղեցին զինք բնորոշող իր յատկանիշներն ունի,
առանց որոնց եկեղեցի մը՝ ըլլայ ան օրթոտոքս, կաթողիկէ կամ աւետարանական, չի կրնար Քրիստոսի
պատկանիլ: Այս յատկանիշները ամփոփուած են մեր դաւանանքի բանաձեւին մէջ, զոր կը կոչենք
,հաւատամքե: Եկեղեցիին յատկանիշները չորս հատ են. Մէկութիւնը – Ընդհանրականութիւնը
- առաքելականութիւնը եւ Սրբութիւնը ա- Քրիստոսի Եկեղեցին մէկ է: Քրիստոս իր առաքելութեան
ընթացքին մէկ Եկեղեցի հիմնեց, եւ այդ մէկ եկեղեցիին համար աղօթեց. ,թող մէ՛կ ըլլան ինչպէս
որ մենք մէկ ենքե (Յովհաննէս 17,22): Միութիւնը զոր կայ Յիսուսին եւ իր Հօր միջեւ նաեւ
Եկեղեցւոյ սերտ միութիւնն է Քրիստոսի հոգիին հետ: Բոլորս մէկ եկեղեցւոյ կը պատկանինք,
եւ եթէ մէկ եկեղեցւոյ կը պատկանինք, ուրեմն մէկութիւնը նաեւ դաւանանքի մէկութիւն է: Մէկ
Քրիստոս կը դաւանինք: բ- Քրսիտոսի Եկեղեցին ընդհանրական է, եւ ասիկա անոր երկրորդ
յատկանիշն է: Ընդհանրական է ըսելով կը հասկնանք որ ան բոլոր ժամանակներու եւ բոլոր ազգերուն
համար է, չէ վերապահուած ազգի մը: Եկեղեցին միջազգային է: Բոլոր ազգերը հոն տեղ ունին,
իրենց դիմագիծով եւ ինքնութեամբ, աւանդութիւններով, մշակոյթով, լեզուով, ծէսով եւ ցեղով:
գ- Քրիստոսի Եկեղեցին առաքելական է: Քրիստոս իր հիմնած եկեղեցին շարունակելու իրաւունքն
ու պարտականութիւնը յանձնեց միայն իր առաքեալներուն, առաքեալներն ալ իրենց հերթին՝ իրենց
հիմնած եկեղեցիներուն: Այսպէս՝ Ս. Պետրոս հիմնեց Հռոմի Եկեղեցին, Ս. Յակոբ՝ Երուսաղէմի
Եկեղեցին, Ս. Պօղոս՝ յունական Եկեղեցին, Ս. Մարկոս՝ Աղեքսանդրիոյ Եկեղեցին, իսկ Ս. Բարթողիմէոս
եւ Թադէոս՝ Հայոց Եկեղեցին: Նշելու ենք նաեւ, որ Առաքելական Եկեղեցի ըլլալ՝ կը նշանակէ
ո՛չ միայն առաքեալի մը կողմէ հիմնուած ըլլալ, այլ նաեւ առաքեալներուն վարդապետութեան
ու աւանդութիւններուն շարունակութիւնը պահպանել: դ- Քրիստոսի Եկեղեցին սուրբ է,
որովհետեւ ան Աստուածային է: Սուրբ է վարդապետութեամբ, սուրբ`բարոյականով, սուրբ՝ պաշտամունքով,
սուրբ`անդամներով: Սուրբ Հոգին է որ զայն կը սրբացնէ: Ս. Հոգիին ներգործումով` Եկեղեցին
սրբութեան աղբիւր կը դառնայ, եւ իր հաւատացեալները կը սրբացնէ սուրբ խորհուրդներով (մկրտութիւն,
ապաշխարանք, սուրբ զոհ, պսակ, եւն): Այսպէսով, մեր այսօրուայ խորհրդածութիւնը կը
փակենք: Մեր գալ հաղորդումը որպէս նիւթ պիտի ունենայ Եկեղեցւոյ վսեմ առաքելութիւնը: