Imzot Tomazi: në Lindje, sulmet kundër të krishterëve rriten 309%; në Perëndim, feja
kufizohet në jetën private.
Keqësohet në botë situata për lirinë fetare: kushtrimin e lëshoi, në Gjenevë, imzot
Silvano Maria Tomazi, gjatë sesionit të Këshillit për të Drejtat e Njeriut. Prelati,
vëzhgues i përhershëm i Selisë së Shenjtë pranë Zyrës së Kombeve të Bashkuara në qytetin
helvetik, pohoi se në botë më se 2 miliard e 200 milionë besimtarë pësojnë kufizime
me karakter fetar; përveç këtyre, nga viti 2003, deri në vitin 2010, u rritën 309%
sulmet terroriste kundër të krishterëve në Afrikë, në Lindjen e Mesme e në Azi, ndërsa
në Perëndim jemi përballë një kulture, e cila ka prirjen t’i mënjanojë gjithnjë më
shumë njerëzit, që besojnë në Krishtin. Por, të dëgjojmë, në mikrofonin tonë, vetë
imzot Tomazin:
Përgjigje: - Vëmendja, që i kushtojnë
mjetet e komunikimit këtij problemi, përqendrohet kryesisht tek rastet e bujshme,
të cilat kanë të bëjnë me pakicat e krishtera ose me pakica të tjera fetare në vendet
e pazhvilluara, sepse në këto raste, dhuna është e dukshme, dramatike e krijon sensacionalizëm.
Por problemi nuk kufizohet vetëm në vendet e pazhvilluara; edhe në vendet e perëndimore,
në vendet e mëdha, të pasura, ndodhemi para prirjes, që çon në privatizmin e fesë,
në mospranime kulturore e, ndonjë herë, edhe në qëndrime të hapura armiqësore kundër
së drejtës për lirinë e ushtrimit të fesë, lirinë e besojmës. E kur flitet për arenën
publike, nuk pranohet me dëshirë, madje shpesh dhe refuzohet krejtësisht fakti, se
bindjet fetare kanë ende shumë për të thënë në këtë fushë.
Pyetje: -
Ç’duhet bërë për ta kapërcyer këtë prirje, që synon ta përjashtojë kristianizmin
nga jeta publike?
Përgjigje: - Hapi i parë është të përqendrohet
vëmendja mbi bashkëjetesën e përditshme, që duhet të bazohet mbi respektin reciprok
e mbi aftësinë për ta pranuar njëri-tjetrin, edhe kur ndryshojmë në shumë drejtime.
Pastaj mendoj se një rol jetik, tepër të rëndësishëm, luajnë mjetet e komunikimit,
e jo më pak, shkolla, ku duhet reflektuar shumë për ta pranuar tjetrin, e jo për ta
urryer e për ta luftuar. Kjo vlen edhe për televizonin, për teleditoret, gazetat,
që duhet të japin informacion korrekt e të ekuilibruar për të gjitha grupet përbërëse
të shoqërisë. E kjo, sepse mungesë informimi, do të thotë mungesë edukimi, gjë që
lehtëson përdorimin e njerëzve për interesa politike, duke çuar në abuzime e nganjëherë
edhe në persekutimin e grupeve, posaçërisht, të pakicave. Duhet të punojmë edhe për
drejtësi shoqërore, sepse vetëm duke zhdukur mjerimin, duke ndihmuar zhvillimin, duke
i mundësuar të gjithë të marrin pjesë në drejtimin e pasurisë publike, krijojmë një
mjedis të drejtë për lirinë fetare.
Pyetje: - Një vit më parë vritej
ministri katolik i Pakistanit, Shahbaz Bhatti, ndoshta nga ekstremistët, që donin
të mbronin ligjin mbi blasfeminë…
Përgjigje: - Për fat të
keq, ligji mbi blasfeminë krijon mëdyshje të mëdha, sepse synon të mbrojë një fe të
vetme, në vend që të mbronte të drejtën e të gjithë individëve për praktikimin e një
feje, që e kanë zgjedhur me vullnet të lirë. Kur krijohen parakushte të tilla, që
synojnë mbrojtjen e koncepteve abstrakte, në vend që të mbrojnë të drejtat e njerëzve
konkretë, i hapet rruga shpërdorimeve. Kemi pasur raste vajzash, për shembull, që
akuzohen se blasfemojnë, se përdorin shprehje kundër fesë, pretendime për fyerje kundër
profetit Muhamet e islamit, vetëm e vetëm për t’i burgosur, ose për t’i detyruar të
kthehen në islam, njerëzit që u kundërvihen fanatikëve. Kështu mekanizmi i ligjeve
përdoret kundër asaj, që quhet blasfemi, duke dhunuar lirinë e vërtetë të besimit.
Do të ishte e mirë dhe e drejtë të zhdukej kudo e një herë e përgjithmonë një tip
i tillë ligjshmërie e të përballohej problemi i bashkëjetesës, duke i garantuar të
gjithë qytetarëve e të gjithë njerëzve, të cilët jetojnë në trojet e një shteti, të
drejtën themelore e të patjetërsueshme të lirisë së mendimit, të ndërgjegjes, të fesë
e të praktikës fetare.