Дакументы з судовага
працэса над Галілео Галілеем і Джардано Бруно, прывілей імператара Атона аб заснаванні
Папскай дзяржавы, ліст папы Клемента VII з нагоды шлюба англійскага караля Генрыха
VII і каля 100 іншых унікальных дакументаў з Ватыканскага сакрэтнага архіва прадстаўлены
на выставе, якая адкрылася ў будынку Капіталійскіх музеяў у Рыме. Выстава пад назвай
“Святло ў таямніцы: адкрыццё Ватыканскага сакрэтнага архіва” прымеркавана да 400-годдзя
заснавання гэтай установы. Яе мэтай з’яўляецца пазнаёміць наведвальнікаў з найбольш
цікавымі і каштоўнымі дакументамі, якія ў ёй захоўваюцца. Для гэтага арганізатары
падзеі падрыхтавалі каля 1000 м музейных плошчаў, 170 праектараў і экранаў і 1200
інфармацыйных стэндаў. У інтэрв’ю нашаму радыё, дырэктар Ватыканскага сакрэтнага архіва
біскуп Сэрджыо Пагано расказаў, што экспанаты былі выбраны з улікам іх каштоўнасці.
“Тут прадстаўлены кавалкі берасты, на якой пісалі індзейцы папе, старжытныя пергаменты,
залатыя пячаткі, канкардаты, шкатулкі”, - расказаў іерарх.
“Не з’яўляецца выключэннем
тэма ІІ Сусветнай вайны, для асвятлення якой Дзяржсакратарыят даў дазвол на выкарыстанне
некаторых дакументаў, якія з’яўляюцца даволі аўтаномнымі ў гэтым кантэксце. Гэта важныя
дакументы аб бамбардаванні базылікі св. Лаўрэнція ў Рыме і горада-дзяржавы Ватыкан
у 1943 г. Мы прадставілі некаторыя асколкі бомбаў, якія падалі на базыліку св. Пятра
і былі сабрыныя адным з членаў Папскай жандармерыі ў тую ноч”, - расказаў іерарх.
Ватыканскія сакрэтныя архівы з’яўляюцца галоўным архівам Апостальскай Сталіцы.
Яны былі заснаваны ў 1612 г. папай Паўлам V і захоўваюць дакументы, якія тычацца гісторыі
і кіравання Паўсюдным Касцёлам. Тэрмін “сакрэтныя” азначае “прыватныя”, г.зн. што
яны з’яўляюцца ўласнасцю Рымскага Пантыфіка. Папа звычайна сам прызначае адказнага
за захаванне архіва і караванне ім. Дакументы, якія ў ім захоўваюцца ахопліваюць каля
дванаццаці стагоддзяў гісторыі, з VIII па ХХ ст. і падзелены на 600 архіўных фондаў.
У 1881 г. папа Леў XIII даў магчымасць карыстацца гэтымі архівамі навукоўцам усіх
нацыянальнасцяў і веравызнанняў.