Ndihma Tokës së Shenjtë: thirrje për të mbështetur të krishterët në Lindjen e Mesme
Kongregata për Kishat Lindore bën thirrje të ndihmohet bashkësia e krishterë në Tokën
e Shenjtë, përmes Letrës tradicionale drejtuar ipeshkvijve të mbarë botës për lëmoshët
e së Premtes së Madhe. Mesazhi, nënshkruar nga Prefekti, kardinali Leonardo Sandri,
i fton të gjitha bashkësitë kishtare të organizojnë nisma lutjeje e bamirësie vëllazërore
për të krishterët e kësaj zone, duke pasur mirë parasysh kushtet tejet të vështira,
në të cilat jetojnë. Për dishepujt e Krishtit në të gjithë Lindjen e Mesme, shkruhet
në Mesazh, qëndrimet armiqësore janë bukë e përditshme, që ushqejnë fenë e që, gjithnjë
më shpesh, arrijnë kulmin me martirizim, në kuptimin e mirëfilltë të fjalës. Emigrimi
i të krishterëve është pasojë e mungesës së paqes në këto troje, ku shpresës ia
zë vendin frika përballë një ardhmërie, që duket se nuk ekziston e të fton të ndjekësh
një rrugë të vetme: ta braktisësh përgjithmonë atdheun. Kardinali Sandri, në gjurmët
e thirrjeve të Papës për paqe e solidarietet, u kërkon gjithë të krishterëve të botës
t’i mbështesin projektet e shumta të Rojtarisë së Tokës Shenjte, duke nisur nga meremetimi
i vendeve të kultit, tek veprimtaritë në ndihmë të të rinjve e të familjeve më të
varfëra, të shkollave, të qendrave mjekësore, të banesave, të bursave të studimit
e formave të tjera të solidaritetit, që zhdukin frikën e ringjallin shpresat për një
ardhmëri më të mirë në këto troje, ku nisi krishterimi e ku nuk duhet të mbarojë kurrë. Viti
i Fesë, në 50-vjetorin e Koncilit Ekumenik të Vatikanit, nënvizohet akoma në Mesazh,
do të na nxisë edhe më shumë për të ecur drejt Tokës së Shenjtë, duke shtegtuar më
parë me zemër në misteret e Krishtit, në shoqëri me Nënën e tij të Shenjtë. Të Premten
e Madhe të ardhshme, shtrënguar rreth Kryqit, ta ndjejmë veten pranë këtyre vëllezërve
e motrave tona, që të mund të fitojnë mbi vetminë, përmes solidaritetit vëllazëror.
Kështu ata do të dëshmojnë me trup e shpirt në paqe, se “Jezusi është Zoti” e se Porta
e fesë vijon t’i hapet njeriut edhe sot e kësaj dite, nga kjo Tokë, prej nga buron
falja e mirësia për mbarë familjen njerëzore.