Siri: të krishterët, të kërcënuar nga dhuna, ikin nga vendi
“Të krishterët janë pakica më e kërcënuar nga lufta civile siriane. Të lodhur nga
dhuna, po përpiqen të ikin. E ndjejnë veten fare pa mbrojtje, përballë shkallëzimit
të dhunës, që ka pushtuar vendin. Lutuni për paqen e pajtimin e popullit sirian”:
ftesa, në AziaNjuz, është e imzot Antuë Audo, kryeipeshkëv kalde i Alepit. Ne, të
krishterët, nënvizon prelati, jemi më të ligësht në këndvështrimin psikologjik e edhe
në atë të vetëmbrojtjes. Nuk mund t’i përgjigjemi dhunës me dhunë. Prandaj, e vetmja
rrugë për të shpëtuar jetën, mbetet ikja nga vatrat, siç po ndodh në të gjitha vendet
e Lindjes së Mesme, posaçërisht në Irak. E ky është një dëm i rëndë për Kishën e për
praninë e të krishterëve në Siri. Duke kujtuar ftesën e Papës për dialog, në lutjen
e Engjëllit të Tënzot të 12 shkurtit të kaluar, imzot Audo shpjegon se, pavarësisht
nga frika, të krishterët mund të jenë një urë, që lidh fraksionet në luftë. Prania
jonë, bashkuar rreth Kishës, pohon, e ndihmon si popullsinë e krishterë, ashtu edhe
atë myslimane, të punojë për të mirën e vendit, duke krijuar frymën e pajtimit, jo
atë të hakmarrjes. Prelati kujton edhe punën e Karitasit Sirian, që këto ditë po ndihmon,
në Homs, një nga qytetet më të dëmtuara nga dhuna, më se 500 familje: 400 të krishtera
e 100 myslimane. Karitasi është gjithnjë pranë pleqve e të sëmurëve, falë vullnetarëve
që, në Alep, aktivizojnë të gjithë bashkësinë e krishterë.