Papa për infertilitetin e çiftit: kundër logjikës së fitimit, përkrah shkencës, që
mbron dinjitetin e njeriut
“Martesa e një burri me një grua, është e vetmja rrugë e denjë për të sjellë në jetë
një krijese të re njerëzore, që është gjithnjë dhuratë”. Kështu u shpreh dje Papa,
duke pritur në audiencë 200 pjesëmarrësit në Asamblenë XVIII të përgjithshme të Akademisë
Papnore për Jetën, në përfundim të punimeve, kushtuar temës: “Diagnoza dhe mjekimi
i infertilitetit”. Kujtojmë se punimet e Asamblesë filluan të enjten e kaluar, në
Sallën e re të Sinodit, në Vatikan. Papa i porositi të pranishmit të vijojnë kërkimet,
duke ecur në rrugën e shkencës së ndershme, të frymëzuar gjithnjë nga përpjekja për
të mirën e njeriut, pa harruar dialogun me fenë, e dhe dialogun ndërmjet përmasës
etike dhe asaj të kërkimit shkencor biomjekësor: “Kjo përpjekje nxitet jo
vetëm nga dëshira për t’i dhuruar një fëmijë çiftit, por edhe për t’u kthyer bashkëshortëve
fertilitetin dhe dinjitetin si përgjegjës për lindjen e fëmijëve e si bashkëpunëtorë
të Hyjit, në krijimin e një njeriu të ri. Pa harruar se lidhja e burrit me gruan në
bashkësinë e dashurisë e të jetës, që është martesa, përbën të vetmen rrugë të denjë
për ardhjen në jetë të një krijese të re njerëzore, që është gjithnjë dhuratë”. Duke
kujtuar Udhëzimin Donum vitae, Benedikti XVI nënvizoi se dëshira e ligjshme
për t’u bërë prindër e burrit dhe gruas, që jetojnë në kushtet e infertilitetit, duhet
të gjejë, me ndihmën e shkencës, një përgjigje, që e respekton plotësisht dinjitetin
e tyre si njerëz e si bashkëshortë. Përballë infertilitetit të çiftit, u kujtoi Ati
i Shenjtë të pranishmëve, ju vendosët të kujtoni e të çmoni përmasën morale, duke
kërkuar rrugë për vlerësimin korrekt diagnostik dhe për zhdukjen e shkaqeve të infertilitetit: “Dinjiteti
njerëzor e kristian i lindjes së fëmijës, nuk qëndron tek “prodhimi”, por tek lidhja
me aktin bashkëshortor, tek shprehja e dashurisë së bashkëshortëve, tek bashkimi jo
vetëm biologjik , por edhe shpirtëror”. Prej këndej, Benedikti XVI preku
edhe problemet e teknologjisë së fekondimit artificial, duke u kërkuar anëtarëve të
Akademisë Papnore t’i thellojnë këto problematika, në favor të mbrojtjes së jetës.
Në dhjetë vjetorin e Enciklikës Fides et ratio, më 2008, Papa pati kujtuar se sot
mundësia për fitime të kollajshme, ose, edhe më keq akoma, arroganca e disa shkencëtarëve,
që mendojnë se mund të zëvendësojnë Krijuesin, luajnë nganjëherë rol vendimtar, duke
krijuar një rrezik të vërtetë për njeriun. E ritheksoi këtë edhe në takimin e djeshëm: “Shkencizmi
dhe logjika e fitimit duket sikur sundojnë sot në fushën e infertilitetit e të lindjes
së fëmijëve, duke arritur të kufizojnë edhe shumë zona të tjera të kërkimit shkencor”. Ky,
shqetësimi i Papës, i cili u kujtoi bashkëshortëve, që jetojnë në kushte infertiliteti,
se një gjendje e tillë nuk e errëson martesën e tyre. Ata janë gjithnjë të thirrur
të bashkëpunojnë me Zotin për të krijuar jetë të reja. Thirrja për të dashur, është
thirrje për të dhuruar vetveten; këtë mundësi nuk mund ta pengojë asnjë kusht organik.
Prej këndej, atje ku shkenca nuk gjen përgjigje, përgjigjja, që jep dritë, vjen nga
Krishti Fjalët e fundit Papa ua drejtoi shkencëtarëve: “Njerëzit kanë
besim tek ju, që i shërbeni jetës, kanë besim në impenjimin tuaj për ta ndihmuar njeriun,
që ka nevojë për ngushëllim e shpresë. Mos u tundoni kurrë për ta trajtuar të mirën
e njeriut si problem thjesht teknik. Indiferenca e ndërgjegjes përballë së vërtetës
e së mirës përbën një kërcënim të rrezikshëm për përparimin e vërtetë shkencor”.