Бэнэдыкт XVI: у сферы лячэння бясплоднасці дамінуюць навуковая зацікаўленасць і логіка
прыбытку
25 лютага Бэнэдыкт
XVI прыняў на аўдыенцыі ўдзельнікаў міжнароднай канферэнцыі, арганізаванай Папскай
Акадэміяй жыцця і прысвечанай праблемам дыягностыкі, прафілактыкі і лячэння бясплоднасці.
Мерапрыемства праходзіла 24-25 лютага ў Ватыкане. Святы Айцец адзначыў, што тэма форума
“выражае канкрэтную магчымасць для дыялога паміж этыкай і біямедыцынай”. Папа выказаў
жаданне, каб даследванні ў гэтай сферы кіраваліся прынцыпам пошуку праўды, сапраўднага
служэння дабру чалавека і былі абаронены ад пагрозы стаць толькі “функцыянальнай практыкай”.
“Легітымныя бацькоўскія чаканні сужэнскіх пар, якія знаходзяцца ў стане бясплоднасці,
павінны знайсці з дапамогай навукі адказ, які будзе адпавядаць павазе да іх чалавечай
і сужэнскай годнасці”, - падкрэсліў Папа. Ён звярнуў увагу на тое, што сёння ў сферы
лячэння бясплоднасці дамінуюць выключна навуковая зацікаўленасць і логіка прыбытку,
што абмяжоўвае многія іншыя сферы пошуку вырашэння праблемы.
“Я хачу нагадаць
сужонкам, якія жывуць у сітуацыі бясплоднасці, што нельга з гэтай прычыны расчароўвацца
ў сваім сужэнскім пакліканні. Сужонкі пакліканы супрацоўнічаць з Богам ў стварэнні
новага жыцця. Пакліканне любові, гэта пакліканне дара з саміх сябе і гэтага ніякі
арганічны стан не можа вас пазбаціць. Там дзе навука не знаходзіць адказу, адказ
дае святло, якое паходзіць ад Хрыста”, - сказаў Бэнэдыкт XVI.
Папа звярнуўся
да ўдзельнікаў канферэнцыі з заклікам падтрымліваць дыялог з верай у сваіх даследваннях.
Ён нагадаў, што “розум заўсёды павінен ачышчацца”, бо перад ім існуе пагроза “этычнай
слепаты”, якую выклікаюць пэўныя прыватныя інтарэсы і жаданне большай улады. “Вера
дазваляе розуму найлепшым чынам выконваць сваё заданне і лепш бачыць у чым яно заключаецца”,
- сказаў Святы Айцец.
“Не паддавайцеся спакусе разглядаць дабро чалавека
толькі як тэхнічную праблему. Абыякавасць сумленняў у адносінах да праўды і дабра
прадстаўляе сур’ёзную пагрозу для сапраўднага навуковага прагрэса”, - падкрэсліў
Бэнэдыкт XVI.