Кс. Фэдэрыко Ламбардзі,
кіраўнік Залі Друку Апостальскай Сталіцы і дырэктар Ватыканскага радыё, звярнуў ўвагу
на неабходнасць спрыяння наступленню міра ў Самалі. Святар нагадаў, што 23 лютага
ў Лондане закончылася міжнародная канферэнцыя па праблемах гэтай краіны і падкрэсліў,
што існуе надзея на тое, каб гэты форум стаў адпраўным пунктам для аднаўлення дзейнасці
ўрадавых інстытутаў, якія былі разбураны ў выніку нестабільнасці і ўнутранай вайны
і не функцыянавалі на працягу апошніх 20 гадоў.
“Бедная краіна, практычна
кінутая міжнароднай супольнасцю ў хаос і насілле, і ў водах якой з цягам часу развілася
марское пірацтва. Вайна, голад, беднасць: старажытныя заганы чалавецтва працягваюць
бушаваць над народам, які губляе нават ўспамін аб надзеі. Падлічыць колькасць ахвяр
вельмі складана. Іх шмат і яны незлічоныя. Сярод іх, безумоўна, шмат дзяцей. Сведчанні
бежанцаў аб насіллі з боку групоўкі Шабаб выклікаюць жах”, - адзначыў кс. Ламбардзі
.
Італьянскі іезуіт расказаў, што католікі складаюць тут меншасць, а ў многіх
рэгіёнах краіны іх зусім няма. Ён нагадаў, што нават сярод католікаў былі мучанікі,
якія з салідарнасці раздзялілі пакуты гэтага народа. “Узгадаем аб некаторых з іх:
біскуп Каломба, апошні біскуп, які пражываў у Магадзішы, быў забіты ў 1989 г. ў катэдральным
касцёле; Грацыелла Фумагаллі, свецкая верніца, валанцёр і ўрач, забітая у сваёй бальніцы
ў 1995 г.; Анналена Тонэллі, таксама свецкі валанцёр, была забіта ў сваёй бальніцы
ў 2006 г.; с. Леонэлла Сгарбацці, законніца забітая на выхадзе з бальніцы ў 2006 г”,
- нагадаў святар.
“Няхай увесь Касцёл зразумее і прыме тое, што можна заўсёды
нешта губляць, але галоўнае – каб перамагала любоў, праўда, дабрыня, мір, прабачэнне
і рэкі спачування”, - працытаваў іезуіт словы забітай законніцы. “На фундаменце такой
духоўнай спадчыны мы хочам далучыцца да дзейнасці скіраванай на дасягненне грамадзянскай
згоды, міра і аднаўлення Самалі”,- падкрэсліў кс. Ламбардзі.