У Брусэлі пачаліся
мерапрыемствы ў рамках агульнаеўрапейскай ініцыятывы “Місія ў мегаполісах”. У праграме:
сведчанні вядомых бельгійцаў, дыскусіі аб веры, чытанне Евангелля на цэнтральных плошчах
і музычныя прадстаўленні. Сталіца Бельгіі з’яўляецца першым з 12 гарадоў Старога кантынента,
які ўдзельнічае ў гэтым праекце. Дапаможны біскуп Мэхелен-Брусэльскай архідыяцэзіі
Жан Кокеролс адзначыў, што “Місія ў мегаполісах” перш за ўсё скіравана, да тых, хто
з’яўляецца “цёплымі” хрысціянамі – людзей, якія былі ахрышчаны, але ўжо не крочаць
дарогай веры разам з Касцёлам.
У інтэрв’ю агенцтву “SIR” біскуп расказаў, што
большасць бельгійскіх хрысціян, пакінула Касцёл не толькі з прычыны ўнутраных скандалаў.
На думку іерарха ў Еўропе вялікі уплыў у гэтай сферы аказваюць СМІ, якія часта не
аб’ектыўна гавораць аб злоўжываннях. Паводле яго неабходна аднавіць давер да Касцёла
і менавіта ў гэтым заключаецца адна з мэтаў “Місіі”.
Біскуп Жан Кокеролс адзначыў,
што праграма мерапрыемстваў уключае ў сябе катэхезы, мэта якіх заключаецца ў тым,
каб прадставіць веру, як шлях да шчасця, унутранай радасці і сапраўдных жыццёвых даляглядаў.
Асноўнай мэтавай аўдыторыяй ініцыятывы ў Брусэлі былі абраны маладыя пары, якія хоць
і трымаюцца далёка ад Касцёла, але цікавяцца некаторымі пытаннямі веры ў сувязі з
неабходнасцю хросту ўласных дзяцей.
Мерапрыемствы ў рамках “Місіі ў мегаполісах”
працягнуцца ў Брусэлі да 15 красавіка. Затым яны пройдуць у іншых 11 вялікіх гарадах
Еўропы.