Кардынал Бэртонэ абмеркаваў сітуацыю ў Папскім універсітэце ў Перу
21 лютага кардынал
Дзяржсакратар Тарчызіо Бэртонэ сустрэўся з рэктарам Папскага каталіцкага універсітэта
ў Перу Марсіалам Рубіо Коррэа. У спецыяльным паведамленні Залі Друку Апостальскай
Сталіцы адзначаецца, што іерарх выказаў падзяку за дзейнасць супрацоўнікаў універсітэта,
а таксама падкрэсліў важнасць існавання шырокага спектра навук, якія выкладаюцца ў
гэтай навучальнай установе. Акарамя таго кардынал Бэртонэ перадаў рэктару ўніверсітэта
заключэнні Апостальскай Сталіцы аб дзейнасці ўстановы, якія былі складзены на падставе
шматлікіх кантактаў і апостальскай візітацыі кардынала Петэра Эрдо ў 2011 г. Візіт
праходзіў у рамках уніфікацыі сістэмы каталіцкай адукацыі ў адпаведнасці з Апостальскай
Канстытуцыяй “Ex Corde Ecclesiae”, абвешчанай у 1990 г. Янам Паўлам ІІ. Кардынал Дзяржсакратар
звярнуў увагу рэктара на неабходнасць унясення некаторых змен у статут універсітэта
для захавання яго каталіцкай ідэнтычнасці і дабра ўсяго Касцёла ў Перу.
Папскі
каталіцкі універсітэт быў заснаваны ў 1917 г. у сталіцы Перу Ліме. Ён з’яўляецца адной
з самых вялікіх і прэстыжных навучальных устаноў у гэтай краіне. У 1986 г. доктарам
“honoris causa” гэтага універсітэта стаў кардынал Ёзэф Ратцынгер. Сёння, на 10 факультэтах
гэтай установы навучаюцца каля 16 тыс. студэнтаў.