Patriku Bartalomeu I kërkon liri të plotë për pakicat jo myslimane në kushtetuën e
re turke
Një dokument 18-faqësh, me të cilin kërkohet “liri e plotë” për pakicat jo myslimane
në Siri. Iu dorëzua personalisht autoriteteve nga Patriku Ekumenik i Kostandinopojës,
Bartolomeu I, në përfundim të një audicioni prej një ore me anëtarët e Komisionit
parlamentar, që po punojnë për rishikimin e Kushtetutës turke. Është hera e parë,
që parlamenti i Ankarasë e fton patrikun të paraqesë propozimet e tij. “Për herë të
parë në historinë e Republikës – tha Bartolomeu I, pasi doli nga salla e audicionit
– pakicat në Turqi u ftuan formalisht të shprehin propozimet e tyre për projektin
e Kushtetutës së re. Fatkeqësisht, ka pasur padrejtësi në dëm të pakicave, por tani,
ato janë pranuar. Po lind një Turqi e re. Largohemi me shpresë nga ky takim e jemi
jashtëzakonisht mirënjohës”. Në dokument, kërkohet që Kushtetuta e re t’i referohet
Traktatit të Lozanës, nënshkruar më 24 korrik 1923, ku përcaktohen marrëdhëniet e
shtetit turk me fetë jo myslimane e ku garantohen të drejtat e bashkësive të krishtera
në vend. Ndër pikat e paraqitura, edhe rihapja e Shkollës teologjike të Halkit, e
cila deri në mbylljen e saj, në vitin 1971, ka qenë shkolla kryesore e teologjisë
në Patriarkatin Ekumenik të Kostandinopojës. Përveç patrikut aktual, në të kanë studiuar
edhe patrikë të shquar të së kaluarës si Demetrius, Athenagoras dhe Maximus V.