Në Pakistan, policia liron të akuzuarin për vrasjen e ministrit Bhatti
Abid Malik, njëri nga dy personat e dyshuar për vrasjen e ministrit katolik pakistanez
Shahbaz Bhatti, u lirua nga policia e vendit, pasi nuk ka prova për fajësinë e tij.
I dyshuari i dytë, Zia-ur-Rehman, akoma nuk është kapur. Për autoritetet e Kishës
Katolike kjo s’është gjë tjetër, veçse përpjekje për “të humbur kohë”. Me sa duket,
policia nuk ka ndërmend të dënojë autorët e krimit. Kujtojmë se Shahbaz Bhatti,
ministër katolik për pakicat në Pakistan, u masakrua me 30 plumba më 2 mars 2011 në
Islamabad. Dyshimet ranë mbi lëvizjet fondamentaliste islamike, të cilat, edhe në
të kaluarën, e kishin kërcënuar Bhattin për luftën e tij kundër ligjit të blasfemisë.
Gjatë këtyre muajve, s’është bërë tjetër, veçse janë devijuar hetimet, duke e motivuar
vrasjen herë për “hakmarrje personale” e herë për “çështje personale”, që nuk kanë
të bëjnë me veprimtarinë politike të ministrit. Ipeshkvi i Islamabadit, imzot Rufin
Anthony, mik personal i Shahbaz Bhattit, akuzon policinë se po bën gjithçka për të
mos e zgjidhur çështjen e për të mos kapur fajtorët e vërtetë.