Міністр-мусульманка заклікала Англію не адмаўляцца ад хрысціянскіх каранёў
У рэлігійных пытаннях
брытанскія палітыкі часцей за ўсё ўжываюць правіла, сфармулаванае Аластэрам Кэмпбеллам:
“Мы не займаемся Богам”. Насуперак гэтаму пайшла мусульманка Саіда Варсі, член урада
Дэвіда Кэмерана, якая заявіла, што ваяўнічы секулярызм уяўляе небяспеку для Еўропы
і заклікала краіну вярнуцца да хрысціянскіх каранёў. Міністр апублікавала ў “Дэйлі
тэлеграф” артыкул, у якім заклікала Еўропу “стаць больш шчырай у сваім хрысціянстве”.
“Развіццё нашых народаў не магчыма без хрысціянскіх каранёў, як еўрапейскі пейзаж
без касцёльнай вежы”, - напісала яна. – “Мяне палохае, што нашы грамадствы захапляе
ваяўнічая секулярызацыя, гэтак жа нязносная, як дыктатарскія рэжымы”.
Нядаўна
Варсі наведала Ватыкан на чале дэлегацыі брытанскага ўраду. Падчас свайго візіту яна
заявіла: “На нашым кантыненце вера занадта часта аказваецца пад падазрэннем. У Вялікабрытаніі
вернікаў робяць ізгоямі, маргіналамі, ніжэйшым гатункам. На рэлігію глядзяць паблажліва,
лічачы яе хобі для дзівакоў, іншаземцаў і прадстаўнікоў меншасцяў”.
Нядаўна
ў тым жа духу выступіў сакратар Палаты абшчын Эрык Піклз, каментуючы рашэнне Вярхоўнага
суда, які прызнаў незаконнай практыку малітвы перад пачаткам афіцыйных пасяджэнняў.
“Мы хрысціянская краіна”, - заявіў тады Піклз.
Падчас перапісу 2001 г. 72%
брытанцаў назвалі сябе хрысціянамі. Што праўда, для многіх, гэта культурная, а не
рэлігійная самаідэнтыфікацыя.