Politika e interesat turko-kineze, pas vizitës së zv.presidentit kinez në Ankara
Pas kthimit nga SHBA-të, zv.presidenti kinez, Xi Jinping vizitoi dje Ankaranë për
bisedime të rëndësishme me autoritetet turke. Kohët e fundit, Kina e Turqia mbajnë
të njëjtin qëndrim përsa i përket dhunës në Siri, duke qenë kundër ndërhyrjes nga
jashtë, përveç rastit kur ajo të kërkohet nga vetë qeveria e Damaskut. Në provincën
e Xingyang-ut në Kinë jeton një pakicë e rëndësishme turkofolëse, objekt i një marrëveshjeje,
që do të nënshkruhet së shpejti. Të dëgjojmë ekspertin italian të çështjeve turke,
Alberto Rosseli: Sipas disa informacioneve, Pekini do t’i propozojë Ankarasë
hapjen e një konsullate në qendrën e provincës së Xingyang-ut. Falë pranisë së përfaqësuesve
ushtarakë turkë, ajo do të ketë për detyrë të ndërmjetësojë mes fraksioneve më autonomiste
e kundërshtare të Kinës dhe vetë qeverisë kineze. Në këmbim, Turqia do të ketë avantazhe
ekonomike në të ardhmen, pasi Kina do t’i lejojë shfrytëzimin e pjesshëm të minierave
të uraniumit e të metaleve të tjera të çmuara në Xingyang. Turqia po bëhet
gjithnjë e më tepër e rëndësishme në Lindjen e Mesme e në Mesdhe, aq sa po flitet
për “neo-otomanizëm”. Sipas jush, ajo është e interesuar për një rol udhëheqës në
këtë zonë? Pa dyshim. Kryeministri turk Erdogan dëshiron të jetë kreu i drejtimit
të ri, që ka marrë politika arabe. Me të drejtë, ju folët për “neo-otomanizëm”. Vërejmë
rilindjen e tij, pasi Turqia e ka ndjerë gjithnjë veten si trashëgimtare e kulturës
arabe, e cila është shumë e ndryshueshme nga pikpamja etnike. Prandaj, me forcimin
e brendshëm të Turqisë e me rilindjen e nacionalizmit në dhjetë, pesëmbëdhjetë vjetët
e fundit, vendi është bërë i vetëdijshëm se mund të kushtëzojë, ose të koordinojë
politikën e botës arabe. Një rol udhëheqës, që i njihet pak në Evropë. Ka
pasur gjithnjë tensione ndërmjet Turqisë e Francës, e cila është kundër integrimit
evropian të Turqisë… Çështjet që, në një farë mënyre, e pengojnë normalizimin
e plotë të marrëdhënieve ndërmjet Turqisë dhe Evropës së bashkuar janë të njohura.
Kemi çështjen e Qipros, çështjen kurde dhe atë armene. Duke e ditur se Ankaraja e
ka të vështirë të hyjë në Evropë, Erdogan e kthen vëmendjen nga Lindja e Mesme e madje,
edhe nga zona strategjike e së ardhmes, ajo e Azisë qendrore.