Dhimbja e Papës për zjarrin në një burg të Hondurasit. Koment i zëdhënësit të Vatikanit.
Papa Benedikti XVI shprehu të premten, dhimbjen e tij të thellë për viktimat e zjarrit,
që të mërkurën e kaluar, përfshiu burgun e Komajaguas, në Honduras. Në një mesazh,
që mban firmën e Sekretarit të Shtetit të Vatikanit, kardinalit Tarçizio Bertone,
Ati i Shenjtë i lutet me shpirt Zotit për mëse 350 personat, që gjetën vdekjen në
mes të flakëve. Papa u shpreh afërsinë e tij shpirtërore familjarëve dhe në një çast
trishtimi kaq të madh, ua beson të gjithë Zojës së Sujapës. Mbi këtë ngjarje dramatike,
të dëgjojmë komentin e drejtorit tonë të përgjithshëm, atë Federiko Lombardi, njëkohësisht
zëdhënës i Vatikanit:.... “Një lajm i
kësaj jave e sfidon deri në fund të fundit aftësinë tonë për të na ardhur keq: është
zjarri, që ra në burgun e Komajaguas, në Honduras, ku qindra të burgosur – mëse 350,
pa llogaritur të plagosurit – gjetën vdekjen, të asfiksuar e të karbonizuar, në kurth,
në qelitë e tyre. E tmerrshme! Torturë! Thikë në zemër! Mëse një e treta e të burgosurve,
në një burg të mbushur ku s’mbante më – siç ndodh shpesh sidomos në vendet më të varfëra,
por jo vetëm atje. E nuk është hera e parë. Tragjedi të tilla na kujtohen mirë gjatë
viteve të fundit. Nuk janë të rralla. Gjithnjë në Honduras, mëse 100 të vdekur në
San Pedro të Sulës, në vitin 2004. E pastaj, në Kili, në Algjeri, në Republikën Dominikane,
në Brasil, në Arabinë Saudite, Marok, El Salvador, Tunizi, Argjentinë, Meksikë… Kur
bie zjarri në burg, gati gjithmonë bëhet kërdia. Kujdes! Fakti që këta
njerëz kanë gabuar, nuk i privon nga çdo dinjitet, nuk e justifikon lënien e tyre
në një atmosferë dhune, që poshtëron jo vetëm ata, por shpesh, edhe personelin, dhe
e bën të pamundur çdo lloj ripërfshirjeje në jetën shoqërore. Dokumenti
i Sinodit Afrikan, i bërë publik nga Papa në Benin, përmend kushtet e tmerrshme të
të burgosurve në Afrikë, por vizitat e Papëve në burgjet romake, deri në atë të dy
muajve më parë në burgun e Rebibies, e kanë zgjeruar gjithnjë horizontin mbi kushtet
e problemet e rënda të të burgosurve në të gjithë botën, duke kujtuar se gjendja e
tyre është faktikisht, masë impresionuese e nivelit të qytetërimit të vendeve të ndryshme.
Jo më kot, Ungjilli na thotë krejt pa doreza se ky do të jetë njëri nga kriteret e
gjykimit të Zotit për ne: “Isha i burgosur e erdhët të më shihni – isha i burgosur
e NUK më erdhët për vizitë”. Viktimat e shpërfytyruara të Komajaguas, në të vërtetë,
kanë për secilin prej nesh, fytyrën e Krishtit”.