Егіпет: прызначаны часовы кіраўнік Копцка-каталіцкай Царквы
У Егіпце Сінод Копцка-каталіцкай
Царквы, у сувязі з цяжкай хваробай Патрыярха Антоніоса Нагіба, згодна са 132 канонам
Кодэкса Кананічнага Права Усходніх Цэркваў, вырашыў прызначыць часовага кіраўніка
Царквы. Вікарыем, які будзе мець усе кампетэнцыі ў кіраванні Царквой, сінод прызначыў
біскупа Кірылласа Камаля Уільяма Самаана. У сваім першым звароце да вернікаў новы
прадстаяцель заклікаў копцкіх католікаў маліцца за хуткае выздараўленне Патрыярха
Нагіба і яго вяртанне да кіраўніцтва Царквой. Іерарх адзначыў, што будзе працягваць
шлях дыялогу і адкрытасці, пачаты кардыналам Нагібам, асабліва падчас палітычных змен,
якія адбываюцца ў Егіпце.
Біскупу Самаану 65 гадоў. Ён праходзіў навучанне
ў Папскім біблійным інстытуце ў Рыме. Біскупскае пасвячэнне атрымаў у 1990 г. На працягу
шматлікіх гадоў прымаў удзел у хрысціянска-мусульманскім дыялогу. З’яўляецца членам
Выканаўчага камітэту Рады Цэркваў Блізкага Усходу.