Një javë tejet e ngarkuar me veprimtari për Papën. Impenjimi i parë është mbledhja
e jashtëzakonshme e të gjithë kardinajve të botës, sot paradite. Nesër,
pastaj, do të mbahet Koncistori për krijimin e 22 kardinajve të rinj (18, me të drejtë
zgjedhore). Do të miratohen edhe dekretet për shpalljen e shtatë shenjtorëve. Të
dielën Papa do të kryesojë, në Bazilikën e Shën Pjetrit, Meshën e madhe, në bashkëkremtim
me kardinajtë e rinj. Të hënën, në Sallën e Palit VI, do të presë në audiencë
kardinajtë e sapokrijuar, shoqëruar nga familjarët, miqtë e dashamirët. Të mërkurën,
Benedikti XVI do t’i prijë procesionit tradicional në Aventin, për t’u përhirë pastaj,
si çdo besimtar, në këtë ditë, që shënon për të gjithë katolikët, fillimin e Kohës
së Kreshmëve. Së fundi, të enjten, takimi tradicional i fillimit të Kreshmëve
me meshtarët e dioqezës së Romës, të cilëve do t’u mbajë një “lectio divina”.