Imzot Çullikat: tregtia e paligjshme e armëve ka si pasojë dhunën e varfërinë.
Bashkësia ndërkombëtare ka nevojë për një mjet ligjor të fortë, të besueshëm e të
suksesshëm, që mund të rregullojë e të përmirësojë transperencën e tregtisë së armëve
konvencionale e të municioneve. Këtë nënvizoi Imzot Frensis Çullikat, vëzhgues i përhershëm
i Selisë së Shenjtë pranë Kombeve të Bashkuara, duke folur, më 13 shkurtin e kaluar,
në sesionin e katërt të Komitetit përgatitor për Konferencën e OKB me temë ‘Traktati
mbi tregtimin e armëve”, që do të mbahet në korrikun e ardhshëm. Sesioni vijon punimet
në Nju Jork.
Tregtimi i parregullt e jo transparent i armëve, për shkak të
mungesës së sistemeve efikase të monitorazhit, ka pasoja të rënda në planin humanitar.
Zhvillimi njerëzor, vërejti imzot Çullikat, ngadalësohet; rreziku i konflikteve shtohet;
proceset e paqes vihen në rrezik e lehtësohet përhapja e kulturës së dhunës e të kriminalitetit.
Prandaj, shpjegoi imzot Çullikat, është e nevojshme që e gjithë bashkësia ndërkombëtare
t’i kundërvihet me përgjegjësi këtij fenomeni. Duke kujtuar se në një aksion të tillë
duhet të marrin pjesë shtetet, organizatat ndërkombëtare e organizmat jo qeveritare,
vëzhguesi i përhershëm i Selisë së Shenjtë pranë Kombeve të Bashkuara, nënvizoi se
parimi themelor i Traktatit mbi tregtinë e armëve, duhet të jetë përpjekja për ndërtimin
e një bote, që e respekton më shumë dinjitetin e njeriut dhe vlerën e jetës njerëzore.
Kriteret e zbatimit të Traktatit, shtoi imzot Çullikat, duhet t’i kenë mirë parasysh
të drejtat e njeriut e të drejtën humanitare për zhvillim, fusha në të cilat ndikimi
i tregut të paligjshëm të armëve është veçanërisht i fortë. Së fundi, duhet t’i kushtohet
vëmendje kufizimit të përhapjes së paligjshme e armëve, përmes pakësimit të prodhimit
të tyre. Në këtë këndvështrim, përfundoi imzot Çullikat, na duket e nevojshme të theksohen
mirë në Traktat, proceset edukative dhe programet që, duke aktivizuar të gjithë sektorët
e shoqërisë, përfshirë edhe organizatat fetare, duhet të përpiqen për të përhapur
kulturën e paqes.